ដោយ:លាងហួរ
ម៉ានីល: អាជ្ញាធរស្ថិតិហ្វីលីពីន (PSA) បានរាយការណ៍នៅថ្ងៃព្រហ ស្បតិ៍នេះថា សេដ្ឋកិច្ចរបស់ប្រទេសហ្វីលីពីន បានកើនឡើង៧,៦ភាគរយធៀបនឹងឆ្នាំមុន នៅក្នុងត្រីមាសទី៣នៃឆ្នាំ២០២២នេះ។
នៅក្នុងសន្និសីទសារព័ត៌មានមួយ ប្រធានអាជ្ញាធរស្ថិតិហ្វីលីពីន(PSA)លោក Dennis Mapa បានមានប្រសាសន៍ថា ប្រភពរួមចំណែកសំខាន់ ដល់ផលិតផលក្នុងស្រុកសរុប(GDP) រួមមាន ពាណិជ្ជកម្មលក់ដុំ និងរាយ ការជួសជុលយានយន្ត និងម៉ូតូ សកម្មភាពហិរញ្ញវត្ថុ និងធានារ៉ាប់រង និងសំណង់។
លោកបានបន្ថែមថា “វិស័យសេដ្ឋកិច្ចសំខាន់ៗដូចជាកសិកម្ម រុក្ខាប្រមាញ់ និងនេសាទ ក៏ដូចជាឧស្សាហកម្ម និងសេវាកម្មទាំងអស់បានបង្ហាញពីកំណើនជាវិជ្ជមាននៅក្នុងត្រីមាសទី៣”។
ចំណែកខាងផ្នែកតម្រូវការ លោក Mapa បានមានប្រសាសន៍ថា ការចំណាយលើ ការប្រើប្រាស់ចុងក្រោយរបស់គ្រួសារ បានកើនឡើង៨ភាគរយ ការចំណាយប្រើប្រាស់ចុងក្រោយ របស់រដ្ឋាភិបាលកើនឡើង០,៨ភាគរយ ការបង្កើតមូលធនសរុបកើនឡើង២១,៧ភាគរយ ការនាំចេញទំនិញ និងសេវាកម្មកើនឡើង១៣,១ភាគរយ និងការនាំចូលទំនិញនិងសេវាកម្មកើនឡើង១៧,៣ ភាគរយ។
នៅក្នុងពេលវេលា នៃភាពមិនប្រាកដប្រជាជាសកល និងការកើនឡើងនៃតម្លៃអ្នកប្រើប្រាស់ កំណើនដ៏ខ្ពស់នៅក្នុងត្រីមាសទី៣ ជាលទ្ធផលល្អ សម្រាប់កិច្ចខិតខំប្រឹងប្រែងរបស់យើង ក្នុងការធានាឱ្យមានការបង្កើតការងារប្រកបដោយគុណភាព និងការកាត់បន្ថយភាពក្រីក្រ ដើម្បីសម្រេចបាននូវកំណើនសេដ្ឋកិច្ច៕
