ដោយ: លាងហួរ
ហាណូយ: យោងតាមរបាយការណ៍ពីក្រសួងហិរញ្ញវត្ថុបានឱ្យដឹងថាប្រទេសវៀតណាម ប្រមូលថវិកាបាន៥៨,៧ពាន់លានដុល្លារអាមេរិក លើសពីការប៉ាន់ស្មាន៣,៧ភាគរយ និងកើនឡើង១៦,២ភាគរយពីមួយឆ្នាំទៅមួយឆ្នាំ។
ប្រាក់ចំណូលក្នុងស្រុក បានកើនឡើង១២,១ភាគរយ ធៀបនឹងរយៈពេលដូចគ្នាកាលពីឆ្នាំមុន។
គួរកត់សម្គាល់ថា ថវិកាដែលប្រមូលបានពីប្រេងឆៅ បានឈានដល់ចំនួន៦៥,៥ពាន់ពាន់លានដុង ដែលលើសពីការប៉ាន់ប្រមាណ៣២,៤ភាគរយ និងកើនឡើង៩៥ភាគរយពីមួយឆ្នាំទៅមួយឆ្នាំ។
ក្រសួងហិរញ្ញវត្ថុវៀតណាមបានប្រកាសថា ការប្រមូលថវិកាបានដ៏ច្រើនលើសពីការប៉ាន់ស្មាននេះ បណ្តាលមកពីកំណើនGDP ដ៏ខ្ពស់ក្នុងរយៈពេល៩ខែដំបូងនៃឆ្នាំ២០២២នេះ។
ជាងនេះទៅទៀត ការឡើងថ្លៃប្រេង និងឧស្ម័នបានជួយឱ្យប្រទេសវៀតណាមរកចំណូលបានកាន់តែច្រើនពីប្រេងឆៅ។
ទោះជាយ៉ាងណាក៏ដោយ ក្រសួងហិរញ្ញវត្ថុបានកត់សម្គាល់ថា ប្រាក់ចំណូលក្នុងស្រុកមាននិន្នាការធ្លាក់ចុះ ដោយសារប្រាក់ចំណូលមធ្យមក្នុងរយៈពេល៥ខែដំបូងនៃឆ្នាំនេះ មានចំនួន១៣០,៨ពាន់ពាន់លានដុង ដែលបានធ្លាក់ចុះដល់ជិត១០០ពាន់ពាន់លានដុងចាប់ពីខែមិថុនា៕
