ប្រាក់កម្ចីគ្រួសាររបស់ធនាគារកណ្តាលកូរ៉េប្រឈមនឹងការដាំក្បាលចុះ ក្នុងខែតុលាកន្លងទៅ

ដោយ: លាងហួរ

សេអ៊ូល: យោងតាមទិន្នន័យរបស់ធនាគារកណ្តាល របស់ប្រទេសកូរ៉េខាងត្បូងបានបង្ហាញកាលពីថ្ងៃពុធ ទី០៩ ខែវិច្ឆិកា ថា ប្រាក់កម្ចីគ្រួសាររបស់ធនាគារកូរ៉េបានដាំក្បាលចុះ កាលពីខែតុលាកន្លងទៅ ស្របពេលថ្លៃដើមលើប្រាក់កម្ចីកាន់តែហក់ខ្ពស់ឡើង។

ប្រាក់កម្ចីរបស់ធនាគារដល់គ្រួសារ មានចំនួន១០៥៨,៨ពាន់ពាន់លានវ៉ុន(៧៧៦ពាន់លានដុល្លារ) នៅចុងខែតុលា ពោលគឺធ្លាក់ចុះ០,៦ពាន់ពាន់លាន វ៉ុន(៤៤០លានដុល្លារអាមេរិក) ធៀបនឹងខែកញ្ញា។

ប្រាក់កម្ចីគ្រួសារបានបន្តធ្លាក់ចុះ សម្រាប់ខែទី២ជាប់ៗគ្នា ចំពេលមានការដំឡើងអត្រាការប្រាក់យ៉ាងឆាប់រហ័ស ដើម្បីទប់ស្កាត់អតិផរណា។

ធនាគារកណ្តាលកូរ៉េ បានចាប់ផ្តើមរឹតបន្តឹងគោលជំហរគោលនយោ បាយរូបិយវត្ថុរបស់ខ្លួន ចាប់តាំងពីខែសីហាឆ្នាំ២០២១ ដោយបានដំឡើងអត្រាការប្រាក់ចំនួន៨ដង ពីកម្រិតទាបបំផុត០,៥ភាគរយដល់៣ភាគរយ។

ប្រាក់កម្ចីទិញផ្ទះ ដល់គ្រួសារបានកើនឡើង១,៣ពាន់ពាន់លានវ៉ុន(៩៥៣លានដុល្លារអាមេរិក) នៅក្នុងខែតុលា ប៉ុន្តែប្រាក់កម្ចីឥណទានបានធ្លាក់ចុះ១,៩ពាន់ពាន់លាន វ៉ុន(១,៤ពាន់លានដុល្លារអាមេរិក) ពោលគឺរក្សានិន្នាការធ្លាក់ចុះសម្រាប់រយៈពេល១១ខែជាប់ៗគ្នា។

ប្រាក់កម្ចីសាជីវកម្ម បានកើនឡើង១៣,៧ពាន់ពាន់លានវ៉ុន(១០ពាន់លានដុល្លារ) ធៀបនឹងខែមុនដល់១១៦៩,២ពាន់ពាន់លានវ៉ុន(៨៥៦,៩ពាន់លានដុល្លារ) នៅចុងខែតុលា ពោលគឺបន្តកើនឡើងសម្រាប់ខែទី១០ជាប់ៗគ្នា។

ទន្ទឹមនឹងនេះដែរ ប្រាក់បញ្ញើរបស់ធនាគារ មានចំនួន២២៥២,១ពាន់ពាន់លានវ៉ុន (១,៦៥ពាន់ពាន់លានដុល្លារ) នៅចុងខែតុលា ពោលគឺកើនឡើង៦,៨ពាន់ពាន់លាន វ៉ុន(៥ពាន់លានដុល្លារ)ធៀបនឹងខែកញ្ញាកន្លងទៅ៕