ដោយ: លាងហួរ
សិង្ហបុរី: រដ្ឋមន្ត្រីក្រសួងអភិវឌ្ឍន៍ជាតិលោក Desmond Lee បានមានប្រសាសន៍ថា តម្រូវការនៃការជួលផ្ទះនៅប្រទេសសិង្ហបុរី បានហក់ឡើងនាពេលថ្មីៗនេះ ដែលជំរុញមកពីការស្នាក់នៅបណ្តោះអាសន្ន ដោយសារមានការពន្យារពេលសាងសង់ និងតម្រូវការក៏ហក់ឡើងខ្ពស់ផងដែរ។
តម្រូវការជួលផ្ទះដែលគ្រប់គ្រង ដោយក្រុមប្រឹក្សាលំនៅដ្ឋាន និងអភិវឌ្ឍន៍ (HDB) បានកើនឡើងដល់កម្រិតខ្ពស់បំផុត នៅក្នុងត្រីមាសទី៣នៃឆ្នាំ២០២២ ពោលគឺកើនឡើង៧,៥ភាគរយ ពីមួយត្រីមាសទៅមួយត្រីមាស នេះបើយោងតាមសន្ទស្សន៍ SRX Rental Index ។
នៅក្នុងរយៈពេល៩ខែដំបូងនៃឆ្នាំ២០២២ បរិមាណនៃការជួលរបស់HDBបានកើនឡើង២០,៩ភាគរយ។
យោងតាមទិន្នន័យរបស់អាជ្ញាធរអភិវឌ្ឍន៍ ទីក្រុងបានឱ្យដឹងថា តម្រូវការជួលអចលនទ្រព្យឯកជន បានកើនឡើង៨,៦ភាគរយ នៅក្នុងត្រីមាសទី៣នៃឆ្នាំនេះ បន្ទាប់ពីបានកើនឡើង ៦,៧ភាគរយនៅក្នុងត្រីមាសទី២។
នៅក្នុងការឆ្លើយតបជាលាយលក្ខណ៍អក្សរ របស់សភាកាលពីថ្ងៃចន្ទ ទី០៧ ខែ វិច្ឆិកា លោក Lee បានមានប្រសាសន៍ថា រដ្ឋាភិបាលត្រួតពិនិត្យយ៉ាងដិតដល់ លើទីផ្សារអចលនទ្រព្យ រួមទាំងទីផ្សារជួលលំនៅដ្ឋានផងដែរ។
លោក Lee បានមានប្រសាសន៍ថា រដ្ឋាភិបាលកំពុងតាមដានទីផ្សារយ៉ាងដិតដល់ ដោយសារការកើនឡើងតម្លៃជួល អាចប៉ះពាល់ដល់ប្រជាជនសិង្ហបុរីដែលត្រូវការជួល ក៏ដូចជាជនបរទេសផងដែរ៕