ដោយ:លាងហួរ
ទីក្រុងបុមបៃ: របាយការណ៍របស់ក្រុមប្រឹក្សាមាសពិភពលោក កាលពីថ្ងៃអង្គារម្សិលមិញនេះ បានឱ្យដឹងថា តម្រូវការមាសរបស់ប្រទេសឥណ្ឌាបានឈានឡើងដល់កម្រិត មុនជំងឺរាតត្បាតដោយប្រទេសនេះកំពុងត្រូវការលោហៈធាតុពណ៌លឿងយ៉ាងច្រើនសន្ធឹកសន្ធាប់។
តម្រូវការលោហៈពណ៌លឿង នៅក្នុងខែកក្កដាដល់ខែកញ្ញា មានចំនួន១៩១,៧តោន ពោលគឺកើនឡើង១៤ភាគរយធៀបនឹងឆ្នាំ២០២១។
លោក Somasundaram PR នាយកប្រតិបត្តិនៃក្រុមប្រឹក្សាមាសពិភពលោក របស់ប្រទេសឥណ្ឌា បានមានប្រសាសន៍ថា តម្រូវការគ្រឿងអលង្ការមាសសរុប នៅក្នុងប្រទេសឥណ្ឌា ក្នុងអំឡុងត្រីមាសទី៣ នៃឆ្នាំ២០២២នេះ។ វាបានកើនឡើង១៧ភាគរយ ដល់១៤២,៦តោន ធៀបទៅនឹង១២៥,១តោនក្នុងរយៈពេលដូចគ្នា កាលពីឆ្នាំមុន ខណៈដែលមាសកែច្នៃសរុបមានចំនួន១៦តោន ពោលគឺធ្លាក់ចុះ២៣ភាគរយ បើធៀបនឹង២០,៧តោន នៅក្នុងត្រីមាសទី៣ កាលពីឆ្នាំ២០២១។
លោក Somasundaram បានមានប្រសាសន៍បន្តថា ការងើបឡើងវិញនៃតម្រូវការគ្រឿងអលង្ការមាសត្រូវបានជំរុញជាចម្បងដោយទីក្រុងនៃប្រទេសឥណ្ឌា ជាពិសេសផ្នែកភាគខាងត្បូង ដែលគាំទ្រដោយសកម្មភាពសេដ្ឋកិច្ចដ៏រឹងមាំ។
លោកបានបន្ថែមថា តម្រូវការមាសសម្រាប់ពេញមួយឆ្នាំនេះ ត្រូវបានគេប៉ាន់ប្រមាណថា មានចំនួនប្រហែល៧៥០ទៅ ៨០០តោន ស្រដៀងនឹងឆ្នាំ២០២១ដែរ៕
