ដោយ៖ សហការី
ភ្នំពេញ៖ ក្នុងឆ្នាំ២០២២នេះ កម្ពុជាកំពុងបង្កើនដំណើរការនីតិវិធីលក់ឥណទានកាបូនពី១លានហិកតា ទៅជិត៣លានហិកតា ដើម្បីយកថវិកាមកប្រើប្រាស់ក្នុងការអភិរក្សធនធានធម្មជាតិ និងចូលរួមអភិវឌ្ឍន៍សហគមន៍នៅមូលដ្ឋាន។
នេះបើយោងតាម លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានក្នុងសន្និបាតបូកសរុបលទ្ធផលការងារបរិស្ថានឆ្នាំ២០២២ និងលើកទិសដៅការងារឆ្នាំ២០២៣។
លោករដ្ឋលេខាធិការ បានមានប្រសាសន៍ថា “ឆ្នាំ២០២២នេះ គឺជារបត់ថ្មីមួយដែលកម្ពុជារបស់យើងបានទទួលចំណូល ពីការអភិរក្សរបស់ខ្លួន តាមរយៈការលក់ឥណទានកាបូន ដែលការលក់ឥណទានកាបូននេះគឺចាប់តាំងពីឆ្នាំ២០១៦ មក ហើយផ្ទៃដីនៃការលក់ឥណទានកាបូននេះ គឺនឹងបង្កើនឡើងពី១លានហិកតា ទៅជិត៣លានហិកតា ដែលស្មើប្រមាណជាង៣០%នៃផ្ទៃដីអភិរក្សនៃប្រទេសកម្ពុជារបស់យើង”។
លោកបានបញ្ជាក់ថា ថវិកាដែលបានពីការលក់ឥណទានកាបូននេះ ត្រូវបានប្រើប្រាស់សម្រាប់ការអភិរក្ស ធនធានធម្មជាតិ និងចូលរួមអភិវឌ្ឍសហគមន៍នៅមូលដ្ឋានក្នុងនោះ រួមមានការផ្តល់ជម្រើសថ្មី និងកែប្រែជីវភាព ព្រមទាំងការបណ្តុះបណ្តាលសហគមន៍ និងសម្រាប់បម្រើសេវាកម្មដល់ភ្ញៀវទេសចរ ដែលទៅទស្សនាកម្សាន្តនៅក្នុងតំបន់សហគមន៍របស់ពលរដ្ឋផងដែរ។
ប្រទេសកម្ពុជាបានលក់ឥណទានកាបូន ទៅក្រុមហ៊ុនអន្តរជាតិធំៗចាប់ពីឆ្នាំ ២០១៦ មកដល់ឆ្នាំ ២០២០ បានទឹកប្រាក់ចំនួន ១១,៦លានដុល្លារអាមេរិក។
មិនត្រឹមតែប៉ុណ្ណោះ ក្រសួងបរិស្ថានបានចាត់ទុកថាការលក់ឥណទានកាបូននេះ ជាមោទនភាព មួយសម្រាប់កម្ពុជា ហើយនេះជាជោគជ័យក្នុងការលក់ឥណទានកាបូនក្នុងទីផ្សារស្ម័គ្រចិត្តនៅលើពិភពលោក៕
