ដោយៈ គង់ ម៉ាលីនណា
ភ្នំពេញៈ អគ្គនាយកដ្ឋានពន្ធដារ បានប្រមូលចំណូលពន្ធសម្រាប់ថវិកាជាតិបាន២៩៤៥.៩៥លានដុល្លារ ស្មើនឹង១០៤.៤៨ % នៃផែនការកំណត់ដោយច្បាប់ថវិកាឆ្នាំ២០២២។
ចំនួនថវិកាប្រមូលបាននេះ បានសេចក្តីថា ការប្រមូលចំណូលពន្ធ របស់អគ្គនាយកដ្ឋានពន្ធដារ ប្រមូលចំណូលលើសផែនការចំនួន៤.៤៨% ស្មើនឹងទឹកប្រាក់១២៦.៤១ លានដុល្លារ។
លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកពន្ធដារ បានបញ្ជាក់ឲ្យដឹងនៅរសៀលថ្ងៃទី១ វិច្ឆិកានេះថា លទ្ធផលនៃការប្រមូលចំណូលពន្ធបានរហូតដល់១០៤.៤៨% នៃផែនការប្រចាំឆ្នាំ ត្រឹមតែរយៈពេល១០ខែនេះ ពិតជាមិនអាចកើតមានឡើយ ប្រសិនបើគ្មានការដឹកនាំប្រកបដោយគិតបណ្ឌិត របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ពិសេសក្នុងគ្រាដែលប្រទេសកម្ពុជា កំពុងឆ្លងកាត់ការលំបាកពីវិបត្តិជាច្រើន រួមមានវិបត្តិជំងឺកូវីដ១៩ និងវិបត្តិសង្គ្រាមរុស្ស៊ី-អ៊ុយក្រែន សម្ពាធអតិផរណា និងការកើនឡើងថ្លៃ និងភាពតានតឹងផ្នែកភូមិសាស្ត្រនយោបាយផងដែរ។
លោករដ្ឋមន្ត្រីបន្តថា “ភាពជោគជ័យនៃការប្រមូលពន្ធនេះ ឆ្លុះបញ្ចាំងពីសមិទ្ធផល នៃការកែទម្រង់ស៊ីជម្រៅជាបន្តបន្ទាប់ របស់អគ្គនាយកដ្ឋានពន្ធដារ អនុលោមតាមយុទ្ធសាស្ត្រចតុកោណ និងយុទ្ធសាស្ត្រកៀរគរចំណូល របស់រាជរដ្ឋាភិបាល ពិសេសការបន្តធ្វើទំនើបកម្ម និងអភិវឌ្ឍប្រព័ន្ធបច្ចេកវិទ្យាព័ត៌មានរបស់រដ្ឋបាលសារពើពន្ធ ការពង្រឹងធនធានមនុស្ស និងការពង្រឹងអនុលោមភាព ដោយផ្តោតលើការពង្រឹងអភិបាលកិច្ចល្អ”៕
