ដោយ: លាងហួរ
ភ្នំពេញ: ក្រុមហ៊ុនThe Royal Railway Plc.បានក្លាយជាក្រុមហ៊ុនទី៨ ដែលបានចុះបញ្ជីសញ្ញាប័ណ្ណសាជីវកម្មរបស់ខ្លួន នៅលើទីផ្សារមូលបត្រកម្ពុជា(CSX)នៅថ្ងៃចន្ទនេះ។
អ្នកឧកញ៉ា គិត ម៉េង ប្រធានក្រុមហ៊ុន Royal Railway Plc. បានមានប្រសាសន៍ក្នុងពិធីនេះនាព្រឹកថ្ងៃទី៣១ តុលាថា ក្រុមហ៊ុនបានបោះផ្សាយមូលបត្របំណុលចំនួន១០លាន ដែលបង្កើនចំនួន៤១ពាន់លានរៀល (ប្រហែល១០លានដុល្លារអាមេរិក) ក្នុងដំណាក់កាលដំបូង។
លោកបានថ្លែងថា “មូលបត្របំណុលទាំងនេះ នឹងត្រូវបានប្រើប្រាស់ដើម្បីធ្វើទំនើបកម្មខ្សែផ្លូវរថភ្លើង រទេះ និងក្បាលរថភ្លើង រួមទាំងឧបករណ៍ថ្មីដែលនឹងធ្វើឱ្យសេវាកម្មផ្លូវដែក កាន់តែទំនើបបន្ថែមទៀត”។លោកបានបញ្ជាក់ថា “ក្រោមមូលនិធិនេះ យើងគ្រោងនឹងទិញរទេះភ្លើង ចំនួន១៣០គ្រឿង និងក្បាលរថភ្លើងចំនួន៤បន្ថែមទៀត”។
លោកបន្តថា បច្ចុប្បន្នក្រុមហ៊ុន បានដំណើរការផ្លូវដែកចំនួនពីរខ្សែ ដែលមានប្រវែងសរុប៦៥០គីឡូម៉ែត្រ ដោយខ្សែទី១ តភ្ជាប់ពីរាជធានីភ្នំពេញ ទៅកាន់កំពង់ផែសមុទ្រអន្តរជាតិខេត្តព្រះសីហនុ និងខ្សែទី២ តភ្ជាប់ពីរាជធានីភ្នំពេញ និងក្រុងប៉ោយប៉ែត ជាប់ព្រំដែនប្រទេសថៃ។
យោងតាមប្រសាសន៍លោកគិត ម៉េងបានឱ្យដឹងថា ផ្លូវដែករបស់ប្រទេសកម្ពុជា បានចាប់ផ្តើមដំណើរការម្តងទៀតក្នុងឆ្នាំ ២០១០ ដោយចាប់តាំងពីពេលនោះមក ក្រុមហ៊ុនបានវិនិយោគជាង១០០លានដុល្លារអាមេរិក។
លោកបានបន្ថែមថា បច្ចុប្បន្នរថភ្លើងដឹកអ្នកដំណើរ និងដឹកជញ្ជូនបានបើកដំណើរការ៧ថ្ងៃក្នុងមួយសប្តាហ៍លើខ្សែទាំង២។
អគ្គនាយកទីផ្សារមូលបត្រកម្ពុជា លោកហុង សុហួរ បានមានប្រសាសន៍ថា មូលបត្របំណុលសាជីវកម្មរបស់ក្រុមហ៊ុននេះ មានកាលកំណត់រយៈពេល១០ឆ្នាំ ជាមួយនឹងអត្រាប័ណ្ណបំណុល៧ភាគរយក្នុងមួយឆ្នាំ។
លោកបានបន្តថា “នេះជាប្រវត្តិសាស្ត្រថ្មីមួយ សម្រាប់ផ្សារមូលបត្រកម្ពុជា”។
រហូតមកដល់ពេលនេះ CSX បានទទួលក្រុមហ៊ុនចុះបញ្ជីសរុបចំនួន១៧ ក្នុងនោះមានក្រុមហ៊ុនមូលធនចំនួន៩ និងក្រុមហ៊ុនមូលបត្របំណុលសាជីវកម្មចំនួន៨។
លោក ហុង សុខហួរបានមានប្រសាសន៍ថា គិតមកដល់ពេលនេះ វិនិយោគិនប្រមាណ៣១.០០០នាក់ បានបើកគណនីជួញដូរ នៅលើផ្សារមូលបត្រកម្ពុជា(CSX)៕