ប្រទេសថៃទទួលបានភ្ញៀវទេសចរបរទេសជាង៧លាននាក់ ក្នុងរយៈពេល១០ខែ

ដោយ: លាងហួរ

បាងកក: អាជ្ញាធរទេសចរណ៍ថៃ(TAT) បានប្រកាសថា ប្រទេសថៃបានកត់ត្រា ការមកដល់របស់ភ្ញៀវទេសចរបរទេស រហូតដល់ចំនួន៧,៣៥លាននាក់ បើគិតចាប់តាំងពីថ្ងៃទី១ខែមករា ដល់ថ្ងៃទី២៦ខែតុលា ខណៈដែលវិស័យនេះ បានស្ទុះងើបឡើងវិញ បន្ទាប់ពីការបន្ធូរបន្ថយការរឹតបន្តឹងនៃ ជំងឺកូវីដ១៩។

តាមរយៈសេចក្តីថ្លែងការ របស់អាជ្ញាធរទេសចរណ៍ថៃបានឱ្យដឹងថា ទីផ្សារភ្ញៀវទេសចរកំពូលទាំង៥ របស់ប្រទេសថៃ រួមមាន ភ្ញៀវទេសចរម៉ាឡេស៊ី មានចំនួន១,២៥លាននាក់ ភ្ញៀវទេសចរឥណ្ឌាមាន៦៦១.៧៥១នាក់ ឡាវមាន៥៣៨.៧៨៩នាក់ ចំណែកឯភ្ញៀវទេសចរកម្ពុជាមាន៣៧៣.៨១១នាក់ និងភ្ញៀវទេសចរសិង្ហបុរីមាន៣៦៥.៥៩៣នាក់។

ការងើបឡើងវិញនៃវិស័យទេសចរណ៍ គឺជាកត្តាជំរុញដ៏សំខាន់នៃកំណើនសេដ្ឋកិច្ចរបស់ប្រទេសថៃ ដោយក្រសួងហិរញ្ញវត្ថុថៃបានព្យាករណ៍ថា ការមកដល់នៃភ្ញៀវទេសចរបរទេស នឹងមានចំនួន១០,៣លាននាក់នៅឆ្នាំនេះ និង២១,៥លាននាក់នៅឆ្នាំ២០២៣។

រដ្ឋាភិបាលថៃបានប្រកាសនៅមុននេះថា ប្រទេសថៃគ្រោងរកចំណូលពីវិស័យទេសចរណ៍ ចំនួន៤០០ពាន់លានបាត (១០,៦ពាន់លានដុល្លារ) នៅក្នុងឆមាសទីពីរនៃឆ្នាំ២០២២នេះ៕