ដោយ: លាងហួរ
ប្រទេសសិង្ហបុរី:តម្លៃផ្ទះនៅក្នុងប្រទេសសិង្ហុបុរី បានកើនឡើងក្នុងល្បឿន៣,៨ភាគរយ នៅក្នុងត្រីមាសទី៣នៃឆ្នាំ២០២២នេះ។
កំនើននេះត្រូវបានជំរុញដោយតម្លៃផ្ទះ សង់លើដីកម្មសិទ្ធិរដ្ឋនៅទូទាំងប្រទេសសិង្ហបុរី ដែលបានកើនឡើង៤,៤ភាគរយក្នុងត្រីមាសនេះ។
សន្ទស្សន៍តម្លៃអចលនទ្រព្យលំនៅដ្ឋាន បានកើនឡើងដល់១៨៧,៨ក្នុងត្រីមាសទីពីរ។ នេះបើយោងតាមស្ថិតិអចលនទ្រព្យ ដែលចេញផ្សាយដោយ អាជ្ញាធរអភិវឌ្ឍន៍ទីក្រុង (URA) នៅថ្ងៃសុក្រ ទី២៨ ខែតុលា។
តម្លៃនៃអចលនទ្រព្យ ដែលសង់លើដីកម្មសិទ្ធិរដ្ឋ បានកើនឡើង៤,៤ភាគរយ ពោលគឺកើនឡើងពី៣,៦ភាគរយ កាលពីត្រីមាសមុន។ ចំណែកតម្លៃផ្ទះសង់លើដីរដ្ឋ នៅក្នុងតំបន់កណ្តាលស្នូលកើនឡើង២,៣ភាគរយ បើធៀបនឹង១,៩ភាគរយនៅក្នុងត្រីមាសមុន។
ចំណែកតម្លៃផ្ទះសង់លើដីរដ្ឋ នៅក្រៅតំបន់កណ្តាលមានការកើនឡើងដ៏ខ្លាំងបំផុត ពោលគឺកើនឡើង៧,៥ភាគរយ នៅក្នុងត្រីមាសទី៣ ដែលកើនឡើងពី២,១ភាគរយនៅក្នុងត្រីមាសទី២។
លោកស្រី Christine Sun អនុប្រធានជាន់ខ្ពស់ផ្នែកស្រាវជ្រាវ និងវិភាគរបស់ ក្រុមហ៊ុនOrangeTee & Tieបានលើកឡើងថា យោងតាមចំណែកទីផ្សារ តម្លៃផ្ទះបានកើនឡើងច្រើនបំផុត នៅតាមតំបន់ជាយក្រុង ឬនៅក្រៅតំបន់កណ្តាល ហើយនេះគឺជាការកើនឡើងប្រចាំត្រីមាស ដ៏លឿនបំផុត ចាប់តាំងពីត្រីមាសទី៣នៃឆ្នាំ២០០៩។
តម្លៃផ្ទះដែលសង់លើដីកម្មសិទ្ធឯកជន បានកើនឡើង១,៦ភាគរយនៅក្នុងត្រីមាសទី៣នៃឆ្នាំនេះ ធៀបនឹងការកើនឡើង២,៩ភាគរយនៅក្នុងត្រីមាសមុន ហើយប្រតិបត្តិការលក់បន្ត(Resale) មានចំនួនប្រហែល៦០,៥ភាគរយ នៃប្រតិបត្តិការលក់សរុបនៅក្នុងត្រីមាសទី៣៕
