ដោយៈ សុខុម
ហុងកុង: រដ្ឋាភិបាលអាល្លឺម៉ង់ បានគាំទ្រកិច្ចព្រមព្រៀងដ៏ចម្រូងចម្រាសមួយ ដែលអនុញ្ញាតឱ្យក្រុមហ៊ុនដឹកជញ្ជូនកុងតឺន័រ ខ្នាតយក្សរបស់រដ្ឋចិនCosco ចូលរួមដេញថ្លៃទិញយកភាគហ៊ុន កំពង់ផែសមុទ្រដ៏មមាញឹកបំផុតមួយរបស់ខ្លួន ទោះជាក្រសួងជាច្រើន ព្រមានថាវាបង្កហានិភ័យដល់សន្តិសុខជាតិយ៉ាងណាក្ដី។
គណៈរដ្ឋមន្ត្រីរបស់អធិការបតីអាល្លឺម៉ង់ Olaf Scholz កាលពីថ្ងៃពុធ ទី២៦ ខែតុលា បានផ្ដល់ភ្លើងខៀវឱ្យសម្រុះសម្រួល ធ្វើឱ្យយ៉ាងណាអនុញ្ញាតឱ្យក្រុមហ៊ុនCosco បានចូលរួមដេញថ្លៃទិញយកភាគហ៊ុន “ក្រោម២៥%” នៃកំពង់ផែកុងតឺន័រ Container Terminal Tollerort (CTT) ដែលកាន់កាប់ដោយក្រុមហ៊ុន Hamburger Hafen und Logistik AG (HHLA)។
ទោះជាយ៉ាងណា ក្រុមហ៊ុនយក្សចិន មួយនេះមានមហិច្ឆតាចង់ទិញយកភាគហ៊ុនឱ្យបាន៣៥% ដើម្បីឱ្យខ្លួនមានសិទ្ធិបោះឆ្នោតសម្រេចនៅកំពង់ផែនេះ ប៉ុន្តែគណៈរដ្ឋមន្ត្រីអាល្លឺម៉ង់ មិនព្រមចុះកិច្ចព្រមព្រៀងអនុញ្ញាត។
ក្រសួងសេដ្ឋកិច្ចអាល្លឺម៉ង់ និយាយថា កាន់កាប់ភាគហ៊ុនត្រឹមក្រោម២៥%នេះ ក្រុមហ៊ុនCosco នឹងមិនមានសិទ្ធិបោះឆ្នោត សម្រេចនៅកំពង់ផែនេះឡើយ។
កំពង់ផែដ៏ធំមួយនេះ បានបង្ករភាពចម្រូងចម្រាសយ៉ាងខ្លាំង នៅក្នុងប្រទេសអាល្លឺម៉ង់ និងបានបង្ហាញពីការខ្វែងគំនិតគ្នា យ៉ាងខ្លាំងជុំវិញគោលនយោបាយចិន ក្នុងរដ្ឋាភិបាលចម្រុះត្រីភាគីរបស់អាល្លឺម៉ង់ ដែលបានឡើងកាន់អំណាចកាលពីឆ្នាំមុន៕ South China Morning Post៕
