ដោយ: លាងហួរ
វ៉ាស៊ីនតោន: លោកElon Musk បានជូនដំណឹងដល់បណ្តាសហវិនិយោគិនថា លោកគ្រោងនឹងសម្រេចកិច្ចសន្យាទិញTwitterនៅថ្ងៃសុក្រសប្តាហ៍នេះ ដោយក្រុមសហវិនិយោគិន បានប្តេជ្ញាផ្តល់មូលនិធិ៤៤ពាន់លានដុល្លារ។
ក្រុមវិនិយោគិនដែលចូលហ៊ុន រួមមាន Sequoia Capital, Binance, Qatar Investment Authority និងអ្នកផ្សេងទៀតបានទទួលឯកសារចាំបាច់ស្តីពី ការប្តេជ្ញាចិត្តផ្តល់ហិរញ្ញប្បទាន ពីមេធាវីរបស់លោកMusk ។
ធនាគារដែលប្តេជ្ញាផ្តល់មូលនិធិ ក្នុងការទិញTwitter របស់លោក Musk បានចងក្រងកិច្ចព្រមព្រៀងហិរញ្ញប្បទាន បំណុលរួចរាល់ហើយ និងកំពុងស្ថិត ក្នុងដំណើរការចុះហត្ថលេខាលើឯកសារចាំបាច់នានា។ នេះបើយោងតាមរបាយការណ៍របស់សារពត៌មានBloomberg។
លោក Musk បានសន្យាថា លោកនឹងបំពេញកិច្ចសន្យាតាមការហៅទូរស័ព្ទតាមវីដេអូ នៅថ្ងៃចន្ទជាមួយនឹងធនាគារិក ដែលកំពុងជួយផ្តល់មូលនិធិដល់កិច្ចព្រមព្រៀងនេះ។
ថ្នាក់ដឹកនាំក្រុមហ៊ុនTwitter បានបដិសេធមិនធ្វើអត្ថាធិប្បាយនោះទេ។
ចំណែកមេធាវីរបស់ លោក Muskមិនអាចទាក់ទងបានភ្លាមៗសម្រាប់ការធ្វើអត្ថាធិប្បាយបានផងដែរ៕