ដោយ: លាងហួរ
ភ្នំពេញ: កិច្ចព្រមព្រៀងដឹកជញ្ជូនតាមផ្លូវទឹករវាងប្រទេសវៀតណាម និងកម្ពុជា ដែលបានចូលជាធរមានក្នុងឆ្នាំ២០១១ បានជួយសម្រួលដល់ការឆ្លងកាត់នាវាជិត៧៨.០០០គ្រឿង និងនាវិកជាង៤០៦.០០០នាក់។
យោងតាមរដ្ឋបាលផ្លូវទឹកវៀតណាមបានឲ្យដឹងថា ទំនិញប្រមាណ២០លានតោន និងអ្នកដំណើរចំនួន១,៣លាននាក់ ត្រូវបានដឹកជញ្ជូននិងធ្វើដំណើរតាមផ្លូវទឹកវៀតណាម-កម្ពុជា ដែលរួមចំណែកដល់ការអភិវឌ្ឍសេដ្ឋកិច្ច សង្គម និងវប្បធម៌ក្នុងប្រទេសនីមួយៗ និងមិត្តភាពទ្វេរភាគី។
សេវាកម្មដឹកជញ្ជូនតាមផ្លូវទឹកបានបង្កើតការងារ និងនាំយកថវិកាប្រមាណ៦០លានដុល្លារអាមេរិកដល់អាជីវកម្ម ដែលដំណើរការលើផ្លូវទឹកទាំងនោះក្នុងមួយឆ្នាំៗ។
គិតត្រឹមខែតុលា សហគ្រាស អង្គការ និងបុគ្គលជាច្រើនបានធ្វើប្រតិបត្តិការតាមផ្លូវទឹករវាងប្រទេសវៀតណាម និងកម្ពុជា រួមទាំងក្រុមហ៊ុនធំៗដែលមានការិយាល័យតំណាងនៅក្នុងប្រទេសកម្ពុជាផងដែរដូចជា SNP Gemadept GLS និង Tan Cang Cypress។
ដើម្បីពន្លឿនការអនុវត្តកិច្ចព្រមព្រៀងនេះ ក្រុមមួយត្រូវបានបង្កើតឡើង ដើម្បីដោះស្រាយការលំបាកដែលបានរាយការណ៍ដោយអង្គការ បុគ្គល និងអាជីវកម្ម ហើយក្រុមនេះក៏បានលើកឡើងនូវសំណើ ដើម្បីសម្រួលដល់ការដឹកជញ្ជូន តាមដងទន្លេមេគង្គផងដែរ។
សមាគមភស្តុភារវៀតណាម បាននិយាយថា ភ្នាក់ងារគ្រប់គ្រងរដ្ឋបានចាត់វិធានការដើម្បីបង្កភាពងាយស្រួលដល់ការដឹកជញ្ជូន តាមផ្លូវទឹករវាងប្រទេសទាំងពីរ។
សមាគមនេះបានស្នើឱ្យស្ថាប័នមានសមត្ថកិច្ចពិនិត្យមើលបទប្បញ្ញត្តិ ស្តីពីការត្រួតពិនិត្យទំនិញ និងតភ្ជាប់ផ្លូវឆ្នេរសមុទ្ររវាង Cai Mep-Thi Vai របស់ប្រទេសវៀតណាម និងខេត្តព្រះសីហនុ របស់កម្ពុជា និងដាក់បញ្ចូលផ្លូវ Cua Tieu-Cai Mep-Thai Vai ទៅក្នុងបញ្ជីផ្លូវទឹក ដែលមានចែងក្នុងកិច្ចព្រមព្រៀង៕