ដោយៈគង់ ម៉ាលីនណា
ភ្នំពេញៈ របាយការណ៍បានបង្ហាញថា ទំហំទឹកប្រាក់នៃពាណិជ្ជកម្មទ្វេរភាគីកម្ពុជា ថៃសម្រេចបានទំហំ ទឹកប្រាក់ជាង៣៦០០លានដុល្លារអាមេរិក កើនឡើង២៧ភាគរយ ធៀបរយៈពេលដូចគ្នាកាលពីឆ្នាំាំមុន។
យោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជានៃក្រសួងសេដ្ឋកិច្ច និងហិរញ្ញវត្ថុបានឱ្យដឹងកាលពីចុងសប្តាហ៍មុនថា ការដោះដូរទំនិញទ្វេភាគីកម្ពុជា-ថៃ មានទឹកប្រាក់ជាង ៣,៦ ពាន់លានដុល្លាររយៈពេល៩ខែដើមឆ្នាំនេះ កើនជាង២៧ភាគរយធៀបនឹងរយៈពេលដូចគ្នាឆ្នាំមុន មានទឹកប្រាក់ជាង២,៨ ពាន់លានដុល្លារ។
ទឹកប្រាក់ដែលកម្ពុជានាំចេញ មានចំនួនជាង៦៥៥លានដុល្លារ កើនឡើងពីជាង៤៧៦លានដុល្លារ ឬស្មើ៣៧,៦ភាគរយ ខណៈការនាំចូលមានទឹកប្រាក់ជិត៣ពាន់លានដុល្លារ កើនពីជិត២,៤ពាន់លានដុល្លារ ស្មើនឹងកំណើន២៥ភាគរយ។
លោក អ៊ូក សោភ័ណ្ឌ ឯកអគ្គរាជទូតកម្ពុជាប្រចាំនៅប្រទេសថៃបានបានមានប្រសាសន៍ឲ្យដឹងកាលពីចុងសប្តាហ៍មុនថា ចាប់តាំងពីស្ថានភាពជំងឺកូវីដ១៩ មានភាពធូរស្រាល សកម្មភាពដោះដូរទំនិញរវាងប្រទេសទាំង ២ មានសម្ទុះគួរឱ្យកត់សម្គាល់។
លោកបានបន្តថា “ខ្ញុំបានពិនិត្យតាមដាន តាំងពីប្រទេសយើងបើកដំណើរការសេដ្ឋកិច្ចសង្គមពេញលេញឡើងវិញ គឺការដោះដូរទំនិញប្រទេសទាំង ២មានសម្ទុះខ្លាំង”។ លោកបន្ថែមថា “យើងជំរុញការធ្វើការទូតសេដ្ឋកិច្ចក្នុងគោលបំណង ជំរុញទំនិញយើងចូលទីផ្សារថៃឱ្យកាន់តែច្រើន”។
លោកបានបន្តថា កន្លងមកការបង្កើតមជ្ឈមណ្ឌល ប្រឹក្សាធុរកិច្ចកម្ពុជា (CCB) ក៏ជួយបង្កើនការធ្វើពាណិជ្ជកម្ម រវាងប្រទេសទាំង២ សំដៅធ្វើយ៉ាងណាឱ្យផលិតផលក្នុងស្រុកយើង ចូលទីផ្សារថៃកាន់តែច្រើនដើម្បី កាត់បន្ថយការហូរចូលពីថៃ៕
