ដោយ: លាងហួរ
អាស៊ី: តម្លៃប្រេងនៅអាស៊ីបានកើនឡើង នៅក្នុងការជួញដូរនាព្រឹកថ្ងៃចន្ទនេះ ខណៈពេលដែល វិនិយោគិនកំពុងរង់ចាំទិន្នន័យពីប្រទេសចិន ដើម្បីវាស់ស្ទង់តម្រូវការនាំចូលប្រេងរបស់ប្រទេសនេះ។
តម្លៃប្រេងឆៅ Brent Crude Futures បានកើនឡើងចំនួន៨៥សេន ឬប្រហែល០,៩ភាគរយ ដល់ចំនួន៩២,៤៨ដុល្លារ ក្នុងមួយបារ៉ែល គិតត្រឹមម៉ោង៨:១៩នាទីព្រឹក ម៉ោងនៅសិង្ហបុរី ដែលស្ទុះងើបឡើងវិញពីការធ្លាក់ចុះ៦,៤ភាគរយ កាលពីសប្តាហ៍មុន។
តម្លៃប្រេងឆៅរបស់សហរដ្ឋអាមេរិក West Texas Intermediate មានតម្លៃ៨៦,៣៤ដុល្លារអាមេរិក ក្នុងមួយបារ៉ែល កើនឡើងចំនួន៧៣សេន ឬ០,៩ ភាគរយ បន្ទាប់ពីបានធ្លាក់ចុះ៧,៦ ភាគរយ កាលពីសប្តាហ៍មុន។
លោកស្រី Tina Teng អ្នកវិភាគនៅទីផ្សារ CMC បានមានប្រសាសន៍ថា អនាគតសន្ទស្សន៍ប្រាក់ដុល្លារអាមេរិក បានធ្លាក់ចុះ នៅថ្ងៃនេះ ដែលបានផ្តល់ឱកាសស្ទុះងើបឡើងវិញ សម្រាប់ទីផ្សារប្រេង ដោយសារតម្លៃប្រាក់ដុល្លារធ្លាក់ចុះធ្វើឱ្យប្រេងមានតម្លៃសមរម្យ សម្រាប់អ្នកកាន់រូបិយប័ណ្ណផ្សេងទៀត។
តម្លៃប្រេងត្រូវបានគេរំពឹងថា នឹងនៅតែប្រែប្រួល ដោយសារការកាត់បន្ថយផលិតកម្មប្រេងរបស់អង្គការ OPEC+ ដែលនឹងរឹតបន្តឹងការផ្គត់ផ្គង់ មុនពេលសហភាពអឺរ៉ុបដាក់ទណ្ឌកម្មលើប្រេងរុស្ស៊ី ខណៈប្រាក់ដុល្លារអាមេរិកហក់ឡើងថ្លៃ និងការកើនឡើងអត្រាការប្រាក់៕