ដោយៈគង់ ម៉ាលីនណា
ភ្នំពេញៈ មន្រ្តីជាន់ខ្ពស់ក្រសួងពាណិជ្ជកម្ម បានសម្តែងសុទិដ្ឋិនិយមថា វិនិយោគិនកូរ៉េនឹងចាប់អារម្មណ៍កាន់តែច្រើន ចំពោះកាលានុវត្តភាពនៃការវិនិយោគ និងនាំចេញទំនិញពីកម្ពុជា ទៅទីផ្សារប្រទេសកូរ៉េកាន់តែច្រើន។
ជាមួយគ្នានឹងសុទិដ្ឋិនិយមនេះ ទំហំពាណិជ្ជកម្មទ្វេភាគី រវាងប្រទេសទាំង២ ក្នុងរយៈពេល៨ខែ ឆ្នាំ ២០២២ មានទឹកប្រាក់ជិត៥៥០លានដុល្លារ កើនជាង៦ភាគរយ បើធៀបនឹងរយៈពេលដូចគ្នាឆ្នាំ ២០២១ ។
លោក កឹម ស៊ីថន រដ្ឋលេខាធិការប្រចាំការ ក្រសួងពាណិជ្ជកម្មបានជួបជាមួយ លោក KIM Byung Kwan ប្រធានសមាគមអ្នកនាំចូលកូរ៉េ (Korea Importers Association – KOIMA) និងជាប្រធានអគ្គនាយកក្រុមហ៊ុន Bronte Family Ltd នៅទីស្តីការក្រសួងពាណិជ្ជកម្ម កាលពីថ្ងៃទីដើមសប្តាហ៍នេះ ដើម្បីពិភាក្សាស្វែងយល់ពីឱកាសវិនិយោគ និងធុរកិច្ចនៅកម្ពុជា។
លោកកឹម ស៊ីថន បានលើកឡើងថា ដំណើរទស្សនកិច្ចរបស់គណៈប្រតិភូសមាគមអ្នកនាំចូលកូរ៉េ មកប្រទេសកម្ពុជានាពេលនេះ ពិតជាមានសារៈសំខាន់ណាស់ ហើយកម្ពុជាសូមស្វាគមន៍ ចំពោះដំណើរទស្សនកិច្ចស្វែងយល់ និងចាប់យកកាលានុវត្តភាពសេដ្ឋកិច្ច និងពាណិជ្ជកម្មរបស់អ្នកវិនិយោគិនកូរ៉េនៅកម្ពុជា។
លោកបន្តថា“ខ្ញុំសង្ឃឹមថា តាមរយៈដំណើរទស្សនកិច្ចនេះ នឹងជួយឱ្យលោកប្រធានសមាគមអ្នកនាំចូលកូរ៉េ និងគណៈប្រតិភូជ្រាបច្បាស់ថែមទៀតពីសក្តានុពលរបស់កម្ពុជានាពេលបច្ចុប្បន្ន”។
លោកកឹម ស៊ីថន ក៏បានលើកទឹកចិត្តដល់គណៈប្រតិភូកូរ៉េ ឱ្យប្រើប្រាស់នូវកិច្ចព្រមព្រៀងពាណិជ្ជកម្មសេរីតំបន់ និងដៃគូសេដ្ឋកិច្ច ដែលកម្ពុជាជាសមាជិក ជាពិសេសកិច្ចព្រមព្រៀង ភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP), កិច្ចព្រមព្រៀងពាណិជ្ជកម្មសេរីអាស៊ាន-កូរ៉េ និងកិច្ចព្រមព្រៀងពាណិជ្ជកម្មសេរីទ្វេភាគី កម្ពុជា-កូរ៉េ (CKFTA) ដើម្បីជំរុញឱ្យការធ្វើពាណិជ្ជកម្មរវាងប្រទេសទាំង ២ មានទំហំកាន់តែធំបន្ថែមទៀត។
លោក KIM Byung Kwan បានមានប្រសាសន៍ថា សមាគមអ្នកនាំចូលកូរ៉េ បានបង្កើតឡើងក្នុងឆ្នាំ១៩៧២ ដោយបច្ចុប្បន្នមានក្រុមហ៊ុនជាសមាជិកចំនួន៨៣០០ ក្រុមហ៊ុន ហើយកំពុងធ្វើប្រតិបត្តិការអាជីវកម្មលើវិស័យចំណីអាហារ គ្រឿងបន្លាស់ Software គ្រឿងសម្អាង វត្ថុធាតុដើម វាយនភណ្ឌ កសិកម្ម និងសេវាកម្មជាដើម។
យោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា បង្ហាញថា ក្នុងរយៈពេល៨ ខែដើមឆ្នាំ ២០២២ ការផ្លាស់ប្តូរពាណិជ្ជកម្មរវាងកម្ពុជា-កូរ៉េ មានទឹកប្រាក់សរុប៥៤៩,៩៣ លានដុល្លារ កើនឡើង៦,៤ភាគរយបើធៀបរយៈពេលដូចគ្នាឆ្នាំមុន៕