ដោយៈ សុខុម
ក្រុងឡុងដ៍: អតិផរណាតម្លៃទំនិញប្រើប្រាស់ នៅក្នុងប្រទេសអង់គ្លេស អាចនឹងហក់ឡើងដល់កម្រិតកំពូល១៨% នៅដើមឆ្នាំ២០២៣ខាងមុខនេះ។
នេះបើយោងតាមការឱ្យដឹង ពីអ្នកជំនាញសេដ្ឋកិច្ចមួយរូប នៅធនាគារអាមេរិក Citi ដែលបានដំឡើងការព្យាករណ៍ របស់លោកជាថ្មីម្តងទៀត ដោយសារការឡើងថ្លៃថាមពល នៅរយៈពេលចុងក្រោយនេះ។
លោក Benjamin Nabarro អ្នកជំនាញសេដ្ឋកិច្ចនៅធនាគារអាមេរិក Citi បានលើកឡើងកាលពីថ្ងៃច័ន្ទ ទី២២ ខែសីហា ថា “សំណួរនាពេលនេះគឺថា តើគោលនយោបាយអ្វីដែលអាចប៉ះប៉ូវ នូវផលប៉ះពាល់មកលើអតិផរណា និងសេដ្ឋកិច្ចពិតប្រាកដបាន?”។
តួលេខបង្ហាញថា អតិផរណាតម្លៃទំនិញប្រើប្រាស់ចុងក្រោយ គឺលើស១៨%ក្នុងឆ្នាំ១៩៧៦។ នៅក្នុងខែកក្កដា អតិផរណានៅអង់គ្លេស បានកើនឡើងដល់១០,១% ដែលជាកម្រិតខ្ពស់បំផុត ចាប់តាំងពីខែកុម្ភៈ ឆ្នាំ១៩៨២។
លោក Benjamin Nabarro លើកឡើងថា លោកស្រី Liz Truss អ្នកឈានមុខគេ ដែលនឹងអាចក្លាយជានាយករដ្ឋមន្ត្រី បន្ទាប់របស់អង់គ្លេស ទំនងជានឹងដាក់ចេញវិធានការនានា ដើម្បីជួយគាំទ្រដល់គ្រួសារ ដែលទទួលរងវិបត្តិអតិផរណាធ្ងន់ជាងគេ។
លោកបានបន្ថែមទៀតថា ដោយអតិផរណាឥឡូវនេះ អាចនឹងហក់ឡើងដល់កម្រិតខ្ពស់បំផុត គឺខ្ពស់ជាងការព្យាករ១៣% របស់ធនាគារកណ្ដាលអង់គ្លេស (Bank of England) ក្នុងខែសីហា គណៈកម្មាធិការគោលនយោបាយរូបិយវត្ថុនៃធនាគារនេះ ទំនងជាសន្និដ្ឋានថា ហានិភ័យនៃអតិផរណាបន្តកើនឡើងកាន់តែខ្លាំង៕ Aljazeera៕
