ដោយវឌ្ឈនៈ
ភ្នំពេញៈ ទេសាភិបាលរងធនាគារជាតិនៃកម្ពុជាបានឲ្យដឹងថា ចំណេះដឹងផ្នែកហិរញ្ញវត្ថុ សំដៅដល់ចំណេះដឹងនិងជំនាញគ្រប់គ្រង ក្នុងការចាត់ចែងនិងការធ្វើផែនការហិរញ្ញវត្ថុឱ្យបានត្រឹមត្រូវនិងឆ្លាតវៃ ដែលជាផ្នែកដ៏សំខាន់មួយនៃជីវិត និងជីវភាពរស់នៅរបស់ប្រជាជន។
លោកស្រី នាវ ច័ន្ទថាណា ទេសាភិបាលរង ធនាគារជាតិនៃកម្ពុជា នៅក្នុងកម្មវិធីផ្សព្វផ្សាយស្តីពី “ចំណេះដឹងផ្នែកហិរញ្ញវត្ថុនៅកម្ពុជា” បានឲ្យដឹងបន្តទៀតថា ចំណេះដឹងនិងជំនាញជាមូលដ្ឋានផ្នែកហិរញ្ញវត្ថុ គឺជាការចេះគិតគូរអំពីចំណូលចំណាយ ព្រមទាំងចេះធ្វើផែនការចំណាយ សមស្របទៅនឹងចំណូលរបស់ខ្លួន។
លោកស្រីពន្យល់បន្ថែមថា ចំណេះដឹងផ្នែកហិរញ្ញវត្ថុ នឹងរួមចំណែកដល់ការលើកកម្ពស់កម្រិតបរិយាប័ន្នហិរញ្ញវត្ថុ ដោយជំរុញឱ្យប្រជាជនអាចទទួលបាន និងប្រើប្រាស់សេវាហិរញ្ញវត្ថុផ្លូវការបានកាន់តែច្រើន។ ប៉ុន្ដែគ្រឹះស្ថានធនាគារ និងហិរញ្ញវត្ថុក៏ត្រូវមានកាតព្វកិច្ចផ្ដល់សេវាហិរញ្ញវត្ថុ ប្រកបដោយការទទួលខុសត្រូវ និងតម្លាភាព ព្រមទាំងធានាថាសិទ្ធិ និងផលប្រយោជន៍ស្របច្បាប់របស់អ្នកប្រើប្រាស់សេវាហិរញ្ញវត្ថុ ត្រូវបានការពារយ៉ាងត្រឹមត្រូវ។ ម្យ៉ាងវិញទៀត ចំណេះដឹងផ្នែកហិរញ្ញវត្ថុ ក៏នឹងជួយជំរុញឱ្យមានស្ថិរភាពហិរញ្ញវត្ថុ តាមរយៈការពង្រឹងវិន័យទីផ្សារផងដែរ៕
