ដោយ៖ ម៉ាណេត
ភ្នំពេញៈ តម្លៃមាសក្នុងពិភពលោក ចាប់ផ្តើមឡើងថ្លៃខ្ពស់រហូតដល់ជាង ២០០០ដុល្លាអាមេរិកក្នុង១ដំឡឹង។ មនុស្សជាច្រើនវិនិយោគដោយទិញមាសទុក ដើម្បីជាការទប់ទល់នឹងអតិផរណា ភាពមិនប្រាកដប្រជានៃទីផ្សារ និងការកាត់បន្ថយហានិភ័យតាមរយៈពិពិតកម្មនៃការវិនិយោគ (investment diversification)។
ដោយឡែកកំពូលអ្នកវិនិយោគអាមេរិក លោក Warren Buffett តែងតែលើកឡើងថា ការទិញមាសទុកមិនមែនជាការល្អនោះទេ ព្រោះវាមិនបានផ្តល់ជាផលចំណេញដូចជាការទទួលបានភាគលាភ (dividend) ពីការវិនិយោគលើបណ្ណ័ភាគហ៊ុនឡើយ។
ក្នុងគោលគំនិតប្រហាក់ប្រហែលគ្នានេះដែរ តើយើងគួរវិនិយោគដោយទិញដីទុកយកចំណេញដែរ ឬទេ? បើគួរ ហេតុអ្វី? ហើយគួរវិនិយោគយ៉ាងដូចម្តេច? ចំលើយគឺគួរតែវិនិយោគដោយទិញដីទុក ព្រោះទីផ្សារដីធ្លីនឹងកាន់តែមានភាពប្រសើរ តម្លៃនឹងបន្តកើនឡើងបន្ទាប់ពីការរសាត់បាត់ទៅនៃវិបត្តិកូវីដ១៩ ។ ប៉ុន្តែគួរវិនិយោគតែលើដីធ្លី នៅតំបន់ជាយក្រុងភ្នំពេញ ព្រោះនៅតំបន់ទាំងនោះនឹងបន្តមានតម្រូវការខ្ពស់។
ម្យ៉ាងបើអាចគួរច្នៃជាអចលទ្រព្យ ដែលអាចរកប្រភពចំណូលបានដូចអ្វី ដែលលោក Warren Buffett លើកឡើងពីចំណូល ដែលជាភាគលាភបានពីការវិនិយោគលើបណ្ណ័ភាគហ៊ុនអញ្ចឹងដែរ។ ការច្នៃដីជាយក្រុង អោយក្លាយជាប្រភពចំណូលបាន រួមមានដូចជា ការធ្វើជាឃ្លាំងជួល ផ្សារ ឬប្រកបរបរកសិកម្មជាដើម៕