ដោយ៖ សុផារី
ភ្នំពេញ៖ សមាគមសហគ្រិនវ័យក្មេងកម្ពុជា សហការជាមួយអង្គការជាតិនិងអន្តរជាតិជាច្រើនរៀបចំ “កម្មវិធីបណ្តុះបណ្តាលសម្រាប់សហគ្រាសធុនតូច និងមធ្យម លើអាជីវកម្មបែបឌីជីថល” (SME Incubation Programme on Digitalization) សម្រាប់ជំនាន់ទី២ ដើម្បីអភិវឌ្ឍអាជីវកម្មជាអាជីវកម្មតាមបែបឌីជីថល។
កម្មវិធីនេះនឹងចាប់ផ្តើមទទួលពាក្យ ថ្ងៃទី០១ ខែកុម្ភៈ ឆ្នាំ២០២២ និងផុតកំណត់ទទួលពាក្យថ្ងៃទី០១ ខែមីនា ឆ្នាំ២០២២។
កម្មវិធីនេះរៀបចំដោយ សមាគមសហគ្រិនវ័យក្មេងកម្ពុជា ដោយមានការគាំទ្រដោយ ភ្នាក់ងារអភិវឌ្ឍន៍អង្គការសហប្រជាជាតិប្រចាំនៅកម្ពុជា (UNDP Cambodia) នៅក្នុងភាពជាដៃគូយុទ្ធសាស្រ្តជាមួយក្រសួងពាណិជ្ជកម្ម (MOC) និងសហគ្រិនខ្មែរ (KE) ក្រោមការអនុវត្តការផ្តួចផ្តើមថ្មីសំខាន់មួយ នៃគម្រោងពង្រីកការពាណិជ្ជកម្មតាមប្រព័ន្ធអេឡិចត្រូនិចនៅកម្ពុជា (Go4eCAM) ជាមួយនឹងការផ្តោតលើជំនាញ និងសហគ្រិនភាព សម្រាប់ការធ្វើពាណិជ្ជកម្មតាមប្រព័ន្ធអេឡិចត្រូនិច (SME eBiZnest) ដែលត្រូវបានផ្តល់ការគាំទ្រហិរញ្ញវត្ថុដោយកម្មវិធី Enhance Integrated Framework (EIF) និងក្រសួងសេដ្ឋកិច្ច និងហិរញ្ញវត្ថុ (MEF)។
កម្មវិធីនេះផ្តល់អាទិភាពដល់វិស័យអាទិភាពដូចជា សិប្បកម្ម កសិកម្ម និងកែច្នៃផលិតផលកសិកម្ម កែច្នៃសម្លៀកបំពាក់ ផលិតផលដែលមិនប៉ះពាល់ដល់បរិស្ថាន និងផលិតកម្មខ្នាតតូចក្នុងស្រុក។
លក្ខណៈសម្បត្តិអាជីវកម្មដែលអាចចូលរួមក្នុងកម្មវិធី មានដូចជា អាជីវកម្មដែលបានចុះបញ្ជី និងពុំទាន់បានចុះបញ្ជីអាជីកម្មកែច្នៃ និងចែកចាយផលិតផល (ក្រៅពីសេវាកម្ម) មានទស្សនវិស័យពង្រីកការប្រើប្រាស់បច្ចេកវិទ្យាឌីជីថល អាជីកម្មដែលដឹកនាំដោយស្ត្រីឬមានស្រ្តីជាម្ចាស់ ឬអាជីវកម្មដែលមានមូលដ្ឋាននៅតាមបណ្តាខេត្តនឹងត្រូវបានលើកទឹកចិត្ត ហើយមានការប្ដេជ្ញាចិត្តខ្ពស់ក្នុងការរួមចំណែកដើម្បីការអភិវឌ្ឍប្រកបដោយចីរភាព៕
