ដោយ លក្ខិណា
ភ្នំពេញៈ អ្នកលេងបណ្ដាញសង្គមមួយចំនួន ដែលមិនទាន់មានការគិតជ្រៅជ្រះនៅតែចាញ់បោក ជនមួយក្រុមតូចដែលយកបណ្ដាញសង្គម ជារបររកស៊ីរបស់ខ្លួន ហើយក៏បង្កើតរូបភាពប្លែកៗ ដើម្បីទាក់ទាញការ Like, Share ពីសំណាក់អ្នកលេងបណ្ដាញសង្គម ក្នុងនោះជនឆបោកមួយចំនួន បានបង្ហោះសារដោយផ្ដល់រង្វាន់នេះរង្វាន់នោះ បើសិនជាអ្នកជួយ Like និង Share អោយច្រើន។
ព្រោះតែចង់បានលុយពីជនឆបោកទាំងនោះ អ្នកលេងបណ្ដាញសង្គមខ្លះបានចែកចាយនូវសារនោះជាច្រើនលើកច្រើនសារ ហើយថែមទាំងចូលទៅដាក់លេខទូរសព្ទរបស់ខ្លួនក្នុងប្រអប់ផ្ដល់មតិ ( comment ) ដោយរំពឹងថា នឹងទទួលបានរង្វាន់ពីក្រុមឆបោកទាំងនោះ។ តែតាមពិតវាមិនមែនការផ្ដល់រង្វាន់អ្វីនោះទេ គឺគ្រាន់តែគេបង្កើតសារនោះឡើងដើម្បី អោយផេករបស់គេល្បីហើយយកទៅលក់បន្ត ឬក៏ទៅធ្វើអាជីវកម្មពីផេកនោះប៉ុណ្ណោះ។
លោកឧកញ៉ាគួច ម៉េងលី អគ្គនាយកក្រុមហ៊ុន Mengly J Qouch បានផ្តល់យោបល់ដល់ក្រុមយុវជន ដោយឈប់ចំណាយពេលវេលាអត់ប្រយោជន៍ ហើយស្វែងរកពេលវេលាណាដែលមានប្រយោជន៍ អាចបង្កើតអ្វីធ្វើអោយមានចំណូលរបស់ខ្លួន។
លោកបានលើកឡើងថា “គ្មានអ្នកមានណាម្នាក់លេងបណ្ដាញសង្គម ដាច់យប់ គ្មានអ្នកមានពិតប្រាកដណាដើរលេងដាច់យប់ ដោយគ្មានប្រយោជន៍នោះទេ” ។ លោកបន្តថា “ពេលវេលាណាក៏ជាពេលវេលា សម្រាប់រកលុយរបស់គេដែរ មិនថាយប់ឬក៏ថ្ងៃ ហើយគេចង់ឲ្យពេលវេលាមួយថ្ងៃកាន់តែយូរទៀត ដើម្បីមានពេលក្នុងការធ្វើការងាររកចំណូលបន្ថែម” ។
អ្វីដែលជាកតសម្គាល់ក្នុងប្រទេសកម្ពុជា អ្នកមានថ្មីៗមួយចំនួន មានបានដោយសារតែយកហ្វេសប៊ុក ធ្វើជាសមរភូមិក្នុងអាជីវកម្ម ដែលសំដៅដល់អ្នកលក់អនឡាញ ហើយពួកគេតែងតែសម្ញែង នូវសម្ភារៈទំនើបៗតាមអនឡាញ ដើម្បីអោយអ្នកលេងបណ្ដាញសង្គមជ្រួលជ្រើម និងចង់ធ្វើអ្វីដែលគេធ្វើដែរនោះ ។
បើតាមអ្នករកស៊ីបង្កើត និងលក់ផេកហ្វេសប៊ុកមួយចំនួន គឺមានល្បិចជាច្រើនដើម្បីទាក់ទាញប្រយោជន៍ ពីអ្នកលេងបណ្ដាញសង្គម ដែលមិនមានការគិតជ្រៅជ្រះ តាមរយៈការបង្ហោះរូបភាពទាក់ទាញនានា ដើម្បីទទួលបានការមេដៃ ( like ) និងធ្វើអោយផេករបស់គេល្បីលឿន ហើយអាចលក់បានក្នុងតម្លៃខ្ពស់ផងដែរ គឺអាស្រ័យទៅលើចំនួនអ្នកចូលចិត្តច្រើនឬតិច៕
