ដោយៈសហការី
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា គិតក្នុងរយពេល៨ខែ ឆ្នាំ២០២១នេះ បរិមាណកសិផលដំឡូងមី (ចំណិតដំឡូងមីក្រៀម, ដំឡូងមីស្រស់, ម្សៅដំឡូងមី, កាកសំណល់ដំឡូងមី) ដែលនាំចេញពីកម្ពុជាសរុបចំនួនជាង១,៧លានតោន។
ផ្អែកតាមលទ្ធផលនៃការនាំចេញកសិផល ក្នុងរយៈពេល៨ខែ ឆ្នាំ២០២១ បានរៀបរាប់អំពីការនាំចេញកសិផលដំឡូងមីថា សម្រាប់ចំណិតដំឡូងមីក្រៀមមានចំនួន១ ២៨៣ ៩០៣,១២តោន (កើនឡើងចំនួន ១២,១៧%) ក្នុងនោះនាំចេញទៅប្រទេសថៃចំនួន ៨៥២ ៨០០តោន វៀតណាមចំនួន ៤១១ ៤៥១,៥៦តោន និងចិនចំនួន ១៩ ៦៥១,៥៦តោន។
រីឯដំឡូងមីស្រស់មានចំនួន៤៦៩,៣០០តោន (ថយចុះចំនួន -៤,៦៦%) ក្នុងនោះនាំចេញទៅ ប្រទេសវៀតណាមចំនួន៣៥៥,៥៥០តោន និងប្រទេសថៃចំនួន ១១៣ ៧៥០តោន។
ប្រភពដដែលបានបន្តថា ម៉្សៅដំឡូងមីមានចំនួនជាង១៨,៧០១តោន (កើនឡើងចំនួន ៦,៣៦%) ក្នុងនោះនាំចេញទៅប្រទេសចិនចំនួន ១៦ ៣៥៨,៦០តោន ប្រទេសថៃចំនួន ១ ៣៧៥,៨០តោន អ៊ីតាលីចំនួន ៥០៨,៦៤តោន សហរដ្ឋអាមេរិកចំនួន ១៧០តោន ណេដឺឡែនចំនួន១៥២តោន និងប្រទេសប៊ែលហ្ស៉ិកចំនួន១៣៦តោន។ ដោយឡែក កាកសំណល់ដំឡូងមី មានចំនួន ៥ ៦៦៣,៥០តោន (ថយចុះចំនួន -៣៤,២៥%) ត្រូវបាននាំចេញទៅកាន់ប្រទេសចិន។
លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទបានបញ្ជាក់ថា ពាក់ព័ន្ធតម្លៃនៃការនាំចេញកសិផលកសិកម្ម ការប៉ាន់ស្មានតម្លៃក្នុងរយៈពេល៨ខែ ឆ្នាំ២០២១ ដែលទទួលបានពីការនាំចេញកសិផល (ឯកតាតម្លៃផ្អែកតាមវិក្កយបត្ររបស់អ្នកនាំចេញ) មានចំនួនជាង៣២៣២លានដុល្លារអាមេរិក ក្នុងនោះ៖ការនាំចេញអង្ករមានចំនួន២៩១,៩២៩,៩៥០ដុល្លារ, ការនាំចេញស្រូវមានចំនួន៣៩៣,២១៩,៧៥០ដុល្លារ និងការនាំចេញកសិផលក្រៅពីស្រូវ-អង្ករមានចំនួន២៥៤៧, ២៩៦,០៦៧ដុល្លារអាមេរិក៕