ដោយៈ សាវុធ
ភ្នំពេញៈ សាជីវកម្មហិរញ្ញវត្ថុអន្តរជាតិ (IFC) ដែលជាសមាជិករបស់ធនាគារពិភពលោក ត្រៀមផ្តល់កម្ចី៤០លានដុល្លារអាមេរិកឱ្យធនាគារហត្ថា ដែលធនាគារនាំមុខគេមួយនៅកម្ពុជា ដើម្បីជំរុញដល់ការអភិវឌ្ឍន៍សហគ្រាសធនតូច និងមធ្យមនៅកម្ពុជា។
លោកឧកញ៉ាហួត អៀងតុងប្រធានអគ្គនាយកធនាគារហត្ថា បានថ្លែងប្រាប់នៅថ្ងៃទី១៣ ខែឧសភា ឆ្នាំ២០២១នេះថា ធនាគារហត្ថាបានជជែកគ្នាជាមួយ IFC ដើម្បីស្នើសុំឥណទាន ហើយ IFC ក៏បានឯកភាពជាគោលការណ៍ដែរ ក្នុងការផ្តល់កម្ចី៤០លានដុល្លារនេះ។
លោកឧកញ៉ាបានថ្លែងថា “កម្ចី៤០លានដុល្លារនេះយើងហៅថាជា អនុបំណុល (Sub-Debt) ដែលដើមទុនប្រភេទទី២ របស់យើង ដែលយើងអាចមកប្រើប្រាស់សម្រាប់គណនាជាដើមទុន” ។ លោកបានឱ្យដឹងថា “យើងរំពឹងថានឹងទទួលបានឥណទាននេះក្នុងត្រីមាសទី២ ឬដើមត្រីមាសទី៣” ។
លោកឧកញ៉ាហួត អៀងតុងបានថ្លែងបន្តថា កម្ចី៤០លានដុល្លារនេះយើងយកមក ដើម្បីបម្រើ ដល់ការបញ្ចេញទុនឥណទានរបស់យើង ទៅឱ្យសហគ្រាសខ្នាតតូច និងមធ្យមនៅក្នុងប្រទេសកម្ពុជា ដើម្បីជំរុញឱ្យពួកគាត់មានដើមទុនគ្រប់គ្រាន់ នៅក្នុងការវិនិយោគលើជំនួញរបស់ពួកគាត់ជាបន្ត។
លោកឧកញ៉ាបានឱ្យដឹងទៀតថា ឥណទាននេះយើងទើបតែជជែកគ្នា ហើយIFC នឹងចាប់ផ្តើមធ្វើការសិក្សា និងផ្តល់ឥណទានមកឱ្យយើង។ ធនាគារហត្ថា មានសមត្ថភាព និងគុណវុឌ្ឍិគ្រប់គ្រាន់ ក្នុងការទទួលបានឥណទានពី IFC។ IFC គឺស្ថាប័នអន្តរជាមួយ ដែលមានលក្ខខណ្ឌច្រើន ជាពិសេសលក្ខខណ្ឌ ដែលសមស្របទៅនឹងអភិបាលកិច្ចសាជីវកម្ម (Corporate Governance) ដូច្នេះទាល់តែយើងមានគុណវុឌ្ឍិល្អ ក្នុងការធ្វើឱ្យIFC ធ្វើការផ្តល់កម្ចីមកឱ្យយើង។
គិតត្រឹមដំណាច់ឆ្នាំ ២០២០ ធនាគារ ហត្ថា មានការិយាល័យសរុបចំនួន១៧៧ និងបណ្តាញអេធីអឹមចំនួន១៣៧ នៅទូទាំងប្រទេស។ លើសពីនេះ អតិថិជនបានមកបើកគណនីជាមួយធនាគារហត្ថា គឺជិត៥០ម៉ឺនគណនី ដោយក្នុងនេះ គណនីបញ្ញើសន្សំមានជិត ៣០ម៉ឺនគណនី និងគណនីឥណទានជិត ២០ម៉ឺនគណនី។
ជាមួយគ្នានេះដែរ សំពាធឥណទានរបស់ធនាគារនេះ បានកើនឡើងដល់ជាង១ ៣០០ លានដុល្លារអាមេរិក ស្មើនឹងកំណើនប្រមាណ២៦% បើធៀបនឹងឆ្នាំ២០១៩ និងចំណែកសំពាធប្រាក់បញ្ញើសន្សំ បានកើនឡើងដល់ជិត៨០០លានដុល្លារអាមេរិក ដែលមានកំណើនប្រមាណជាង៣២% បើធៀបនឹងឆ្នាំ២០១៩ ។ ចំណែកអតិថិជន ដែលបានចុះឈ្មោះប្រើប្រាស់សេវាកម្មធនាគារចល័ត បានកើនឡើងរហូតដល់១០៥% គឺកើនឡើងពីជាង៨០០០នាក់ ទៅដល់ជាង១៦,០០០នាក់ បន្ទាប់ពីស្ថាប័ននេះ បានដាក់ឲ្យប្រើប្រាស់ សេវាធនាគារចល័ត ដែលទើបបានធ្វើទំនើបកម្មរួចរាល់កាលពីចុងឆ្នាំ២០២០៕