ដោយៈស៊ីវ ម៉េង
ភ្នំពេញៈ ថ្ងៃទី២០កុម្ភៈ ជាព្រឹត្តិការណ៍មួយ ដែលបានធ្វើឲ្យស្រអាប់ផ្ទៃមេឃកម្ពុជា ហើយបានធ្វើឲ្យអាជីវកម្មនានា និងអចលនទ្រព្យស្ទើរធ្លាក់ដល់សូន្យ ប៉ុន្តែសុទិដ្ឋិនិយមបានចាប់ផ្តើមឡើងវិញ ជាមួយនឹងការថយចុះនូវអត្រាឆ្លងជំងឺកូវីដ និងការបើកចំហរការធ្វើដំណើរឡើងវិញ លើកលែងតែតំបន់ក្រហម។
ការព្យាករណ៍របស់ក្រសួងសេដ្ឋកិច្ច និងហិរញ្ញវត្ថុបានបង្ហាញថា វិស័យនេះនឹងងើបឡើងវិញក្នុងត្រា៤ភាគរយនៅឆ្នាំនេះ ខណៈឆ្នាំមុនការវិនិយោគក្នុងវិស័យនេះបានជួយផ្តល់ភាពធន់ទ្រាំ ក្នុងសេដ្ឋកិច្ចកម្ពុជា។
រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ លោកវង្សី វិស្សុតធ្លាប់បានមានប្រសាសន៍ថា វិស័យអចលនទ្រព្យបានដើរតួនាទី ជាជន្ទល់ដ៏សំខាន់ ក្នុងការទប់ការធ្លាក់ចុះសេដ្ឋកិច្ចកម្ពុជាកាលពីឆ្នាំ២០២០ ។
ជាមួយនឹងរលកទី៣ នៃព្រឹត្តិការណ៍២០កុម្ភៈ វិស័យនេះបានរងភាពទ្រុឌទ្រោមយ៉ាងខ្លាំង ប៉ុន្តែអ្នកជំនាញនៅមានសុទិដ្ឋិនិយមឡើងវិញថា វិស័យនេះបាននិងកំពុងងើបឡើងវិញបណ្តើរៗហើយ។
តើកត្តាអ្វីខ្លះនៅពីក្រោយការងើបឡើងវិញ នៃវិស័យដ៏សំខាន់នេះ? យើងសាកទៅមើលកំលាំងចលករខេដ្ខកិច្ចមួយចំនួន។
កំណើនក្នុងវិស័យកសិកម្ម
កសិកម្មជាវិស័យមួយ ដែលមានភាពធន់ទ្រាំ និងបានងើបឡើង ទោះបីវិស័យដទៃទៀតបានរងផលប៉ះពាលក្តី ដែលនេះជាសញ្ញាវិជ្ជមានមួយ សម្រាប់មូលដ្ឋាននៃការរស់នៅ និងជួយទប់ជីវភាពប្រជាពលរដ្ឋមិនឲ្យធ្លាក់ចុះខ្លាំង។
ដោយសារផ្តើមពីការផលិតដើម្បីបង្គ្រប់ឆ្នាំងបាយ ប៉ុន្តែកសិកម្មបានក្លាយជាវិស័យស្នូល ដែលអាចនាំចេញ ដោយប្រែក្លាយពីការបម្រើទីផ្សារក្នុងស្រុក ប៉ុន្តែផលិតផលវិស័យនេះបានធ្វើពិពិធកម្មយ៉ាងសម្បូរបែប ដែលធ្វើឲ្យមានភាពធន់ និងជំរុញការងើបឡើងនៃសេដ្ឋកិច្ចជាតិ។
ជាក់ស្តែងរយៈពេល៤ខែដើមឆ្នាំនេះ កម្ពុជាបាននាំចេញផលិតផលកសិកម្មជាង៤លានតោន ទៅកាន់ទីផ្សារក្រៅប្រទេស និងទទួលបានទឹកប្រាក់២០០០លានដុល្លារអាមេរិក។
វិស័យនេះ មានកំនើនជាមធ្យមក្នុងរង្វង់២ភាគរយ សម្រាប់ឆ្នាំ២០២០ និងឆ្នាំ២០២១កន្លងមកនេះ។
វិស័យឧស្សាហកម្ម
ទោះបីកម្ពុជា ក៏ដូចជា ពិភពលោកបានរងវិបត្តិជំងឺកូវីដ១៩ក្តី ប៉ុន្តែវិស័យនេះបានងើបឡើង ជាក់ស្តែងការនាំចេញទៅកាន់ទីផ្សារអាមេរិក ទីផ្សារបណ្តាប្រទេសមួយចំនួនទៀតដួចជាសាធារណៈរដកូរ៉េ និងប្រទេសក្នុងតំបន់មួយចំនួនទៀត បានកើនឡើងជាវិជ្ជមាន ដែលនេះបានបង្ហាញសុខភាពក្នុងវិស័យឧស្សាហកម្ម នៅតែមានភាពល្អប្រសើរ ពិសេសការសម្រេចបាននូវកិច្ចព្រមព្រៀងសេរី ជាមួយប្រទេសចិន នឹងជួយឲ្យសេដ្ឋកិច្ចកម្ពុជា សម្រេចបានកំនើនក្នុងរង្វង់៤ភាគរយ តាមការព្យាករណ៍របស់ស្ថាប័នអន្តរជាតិធំៗដូចជា ធនាគារអភិវឌ្ឍន៍អាស៊ី (ADB) មូលនិធិរូបិយវត្ថុអន្តរជាតិ (IMF) ធនាគារពិភពលោក (WB) ជាដើម។
ជាមួយគ្នានេះ ក៏មានដំណឹងល្អពីអាមេរិកផងដែរ ដោយក្រុមហ៊ុនអាមេរិកជាច្រើនត្រៀមចូលមកវិនិយោគនៅកម្ពុជា។ នេះបើតាមការឲ្យដឹងពីលោកឯកអគ្គរដ្ឋទូតអាមរិកលោក Patrict Murphy ។
លោកទូតបានមានប្រសាសន៍កាលពីសប្តាហ៍មុនថា “លំហូរនៃការវិនិយោគ និងពាណិជ្ជកម្មទ្វេភាគីរវាងសហរដ្ឋអាមេរិក និងកម្ពុជា កំពុងតែមានកំណើន ហើយក្រុមហ៊ុនអាមេរិកច្រើនថែមទៀត នឹងបន្តមករកស៊ីក្នុងមួយឆ្នាំៗ ដោយនាំមកជាមួយ នូវរបៀបធ្វើជំនួញប្រកបដោយក្រមសីលធម៌ បទដ្ឋានបរិស្ថាន និងបទដ្ឋានការងារខ្ពស់។
ការវិនិយោគពីវិនិយោគិនក្នុងស្រុកលើវិស័យអចលនទ្រព្យ
បើទោះជាលំហូរទុនវិនិយោពីបរទេស បានជាប់គាំងក្តី ប៉ុន្តែលំហូរទុនវិនិយោគពីអ្នកវិនិយោគក្នុងស្រុក ទាំងតូច ទាំងធំ បានធ្វើឲ្យវិស័យអចលនទ្រព្យ និងសំណង់កម្ពុជានៅតែមានសកម្មភាព លើការសាងសង់ និងការទិញលក់ដីធ្លីជាច្រើន។
តើហេតុអ្វីបានជាវិនិយោគិនក្នុងស្រុក នៅតែបន្តវិនិយោគ? មូលេហតុមួយចំនួនងត្រូវបានបង្ហាញឲ្យឃើញច្បាស់ដូចជា ការអភិវឌ្ឍហេដ្ឋារចនាសម្ព័ន្ឋរបស់រដ្ឋាភិបាលនៅតែមិនផ្អាកសកម្មភាព ទោះបីមានវិបត្តិជំបងឺកូវីដក្តី ទី២ ដោយសារអ្នកវិនិយោគក្នុងស្រុកនៅតែមានសុទិដ្ឋិនិយមថា វិស័យនេះនឹងមានផលចំណេញខ្ពស់នាពេលអនាគត ទី៣ ការកើនឡើងប្រាក់ចំណូលរបស់ប្រជាពលរដ្ឋ នឹងកើនឡើងវិញនៅឆ្នាំ២០២២ខាងមុខ។
ទី៤ ការព្យាករណ៍ពីកំណើនសេដ្ឋកិច្ច របស់ស្ថាប័នអន្តរជាតិធំៗ និងទី៥ កត្តាសន្តិភាព និងស្ថេរភាពនយោបាយរយៈពេលវែង។
មូលដ្ឋានសំខាន់ៗនេះហើយ ដែលវិស័យអចលនទ្រព្យកម្ពុជា នឹងឆាប់ងើបឡើងវិញ ប៉ុន្តែដើម្បីឲ្យវិស័យនេះ សម្រេចបានបានសុខភាពរ៉ឹងមាំឡើងវិញ វាត្រូវការពេលវេលាសមស្របមួយ៕
