ដោយៈសុខុម
ហ្សាការតា: ក្រុមហ៊ុន Nissan កាលពីថ្ងៃពុធ ទី៥ ឧសភា បានប្រកាសលក់ភាគហ៊ុនទាំង១,៥៤%របស់ខ្លួន នៅក្នុងក្រុមហ៊ុនផលិតរថយន្តខ្នាតយក្ស របស់អាល្លឺម៉ង់ Daimler ក្នុងតម្លៃ១,៤ពាន់លានដុល្លារអាមេរិក។ នេះបើយោងតាមសារព័ត៌មាន The Jakarta Post ចុះផ្សាយកាលពីថ្ងៃពុធ ទី៥ ឧសភា។
ក្រុមហ៊ុនផលិតរថយន្តជប៉ុនមួយនេះ បានប្រឹងប្រែងយ៉ាងខ្លាំង ដើម្បីស្ដារប្រាក់ចំណេញ និងស្ដារកេរ្ដិ៍ឈ្មោះរបស់ខ្លួនឡើងវិញ ក្រោយលោក Carlos Ghosn នាយកប្រតិបត្តិរបស់ខ្លួន បានចុះចេញពីតំណែង ហើយបច្ចុប្បន្នអតីតនាយកប្រតិបត្តិរូបនេះកំពុងមានទោស និងរត់គេចខ្លួន។
ក្រុមហ៊ុននេះនិយាយថា ការដកទុនវិនិយោគនេះ នឹងអនុញ្ញាតឱ្យខ្លួន”ពង្រឹងបន្ថែមទៀត និងបង្កើនការប្រកួតប្រជែងរបស់ខ្លួនក្នុងអាជីវកម្ម” ។
ក្រុមហ៊ុននេះនិយាយទៀតថា ប្រតិបត្តិការឧស្សាហកម្មរបស់ខ្លួន ជាមួយក្រុមហ៊ុនផលិតរថយន្តអាល្លឺម៉ង់ Daimler នៅតែរក្សាទុកមិនផ្លាស់ប្ដូរទេ ហើយថា “ក្រុមហ៊ុនទាំង២នៅតែបន្តធ្វើសហប្រតិបត្តិការក្នុងវិស័យជាច្រើន” ។
កាលពីខែមីនា ក្រុមហ៊ុនផលិតរថយន្តបារាំង Renault ក៏បានប្រកាសលក់ភាគហ៊ុនទាំង១,៥៤%របស់ខ្លួននៅក្នុងក្រុមហ៊ុនDaimler ផងដែរ ខណៈក្រុមហ៊ុនផលិតរថយន្តបារាំង មួយនេះ បានរងការខាតបង់ធ្ងន់ធ្ងរ មិនធ្លាប់មាននៅក្នុងឆ្នាំ២០២០ ដោយសារវិបត្តិឆ្លងរាតត្បាតវីរុសកូវីដ-១៩ ។
ក្រុមហ៊ុន Nissan បានធ្វើការព្យាករណ៍ជាថ្មី សម្រាប់រយៈពេលមួយឆ្នាំនេះថា ខ្លួននឹងទទួលរងការខាតបង់ ប្រាក់សុទ្ធរហូតដល់៥៣០ពាន់លានយ័ន (៤,៨ពាន់លានដុល្លារ) សម្រាប់ឆ្នាំសារពើពន្ធគិតត្រឹមខែមីនា គឺទាបជាងការព្យាបាលលើកមុន។
ក្រុមហ៊ុន Nissan ដែលនៅតែរក្សាភាពជាដៃគូ សហការជាមួយក្រុមហ៊ុន Renault និងក្រុមហ៊ុន Mitsubishi នឹងប្រកាសលទ្ធផលប្រាក់ចំណូលប្រចាំឆ្នាំ របស់ខ្លួននៅសប្ដាហ៍ក្រោយនេះ៕