ដោយៈសុខុម
បាងកក: ប្រទេសថៃបានទាក់ទាញលំហូរទុនវិនិយោគដ៏ច្រើន ដោយសំណើវិនិយោគនៅប្រទេសនេះ នៅត្រីមាសទី១ ដើមឆ្នាំ២០២១ នេះបានកើនឡើង៨០%ដល់១២៣ពាន់លានបាត (៣,៩៥ពាន់លានដុល្លារអាមេរិក) ខណៈសំណើវិនិយោគផ្ទាល់ពីបរទេស (FDI) បានកើនឡើងទ្វេដង។ នេះបើយោងតាមក្រុមប្រឹក្សាវិនិយោគថៃ (BoI) បានទម្លាយឱ្យដឹងកាលពីថ្ងៃពុធ ទី៥ ឧសភា។
យោងតាមការចុះផ្សាយរបស់សារព័ត៌មាន Bangkok Post ឱ្យដឹងថា គម្រោងវិនិយោគផ្ទាល់ពីបរទេស ដែលត្រូវបានស្នើសុំមានទំហំសរុប៦២ពាន់លានបាត (២ពាន់លានដុល្លារអាមេរិក) ក្នុងត្រីមាសទី១ ដោយកើនឡើង១៤៣% បើធៀបនឹងត្រីមាសទី១ ដើមឆ្នាំ២០២០ ។
ក្រុមប្រឹក្សាវិនិយោគថៃ បានចេញសេចក្តីថ្លែងការណ៍ថា ប្រទេសចំនួន៣ដែលដាក់សំណើវិនិយោគច្រើនជាងគេបង្អស់ រួមមាន ប្រទេសកូរ៉េខាងត្បូង ប្រទេសចិន និងប្រទេសសិង្ហបុរី។
ក្រុមប្រឹក្សានេះបានគូសបញ្ជាក់ថា វិស័យវេជ្ជសាស្ត្រទាក់ទាញបានការវិនិយោគច្រើនបំផុត ជាមួយនឹងគម្រោងសរុបចំនួន២៩គម្រោង ក្នុងទំហំទឹកប្រាក់១៨,៤ពាន់លានបាត (៥៩០លានដុល្លារអាមេរិក) គឺច្រើនជាង១០០ដងបើធៀបនឹងឆ្នាំមុន។
កាលពីឆ្នាំមុន ការសន្យាវិនិយោគក្នុងស្រុក និងបរទេសបានធ្លាក់ចុះ៣០%ពីឆ្នាំ២០១៩ មកនៅត្រឹម៤៨១ពាន់លានបាត (១៥,៤ពាន់លានដុល្លារអាមេរិក) ខណៈសំណើវិនិយោគបរទេស បានធ្លាក់ចុះ៥៤%មកនៅត្រឹម២១៣ពាន់លានបាត (៦,៨៣ពាន់លានដុល្លារអាមេរិក) ព្រោះក្រុមហ៊ុននានាបានពន្យារពេលវិនិយោគ ដោយសារការឆ្លងរាតត្បាតវីរុសកូវីដ-១៩ ៕
