ដោយៈលក្ខិណា
ភ្នំពេញៈ ទោះជាកម្ពុជាកំពុងជួបនូវវិបត្តិនៃជំងឺកូវីដ១៩ក្ដី តែការនាំចេញផលិតផលមួយចំនួនរបស់កម្ពុជា នៅតែទទួលបានលទ្ធផលផ្លែផ្កាគួរឱ្យកត់សម្គាល់ ជាក់ស្ដែងក្នុងរយៈពេល៤ខែដើមឆ្នាំ ២០២១នេះ ការនាំចេញកៅស៊ូធម្មជាតិរបស់កម្ពុជា ទៅកាន់ទីផ្សារអន្តរជាតិមានទឹកប្រាក់ចំនួន៩៩,៨៧លានដុល្លារអាមេរិក ។ នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។
ក្នុងរបាយការណ៍ក៏បាឱ្យដឹងផងដែរថា ក្នុងរយៈពេល៤ខែដើមឆ្នាំនេះ ការនាំចេញកៅស៊ូទៅកាន់ទីផ្សារអន្តរជាតិមាន៦១.០៥៦តោន ទោះបីមានការរាតត្បាតពីជំងឺកូវីដ១៩ចាប់តាំងពីចុងខែកុម្ភៈ ២០២១នេះមកក្ដី ។ របាយការណ៍ក៏បានបង្ហាញពីការនាំចេញផលិតផលកសិកម្មផ្នែកដំណាំ ទទួលបានទឹកប្រាក់ប្រមាណជាង១.៩៦៣លានដុល្លារអាមេរិក ខណៈការនាំចេញសរុបនៃផលិតផលកសិកម្ម មានជាង២ពាន់លានដុល្លារអាមេរិកក្នុងរយៈពេល៤ខែនេះ ។
បើតាមម្ចាស់ចំការកៅស៊ូ នៅស្រុកបរកែវ ខេត្តរតនគីរីលោក សេង ឡាំងបានឱ្យបានដឹងថា នៅពេលមានវិបត្តិនៃជំងឺកូវីដ១៩ កម្មករចំការកៅស៊ូទាំងអស់ នៅតែបំពេញការងារតាមចំការកៅស៊ូនីមួយៗ ប៉ុន្តែម្ចាស់ចំការកៅស៊ូបានផ្ដល់ ជាប្រាក់កម្រៃប្រចាំថ្ងៃជូនកម្មករវិញ ដោយមិនមែនជាប្រាក់ខែដូចមុននោះទេ ។
លោកឧកញ៉ាលឹម ហេង អនុប្រធានសភាពាណិជ្ជកម្មកម្ពុជាបានមានប្រសាសន៍ថា ដំបូងយើងគិតថា នៅពេលមានវិបត្តិកូវីដ១៩បែបនេះ អ្វីៗនឹងត្រូវអត់ទីផ្សារដូចជាកៅស៊ូជាដើម ក៏ប៉ុន្តែផ្ទុយទៅវិញ ការនាំចេញកៅស៊ូបែរជាទទួលលទ្ធភាពវិជ្ជមានទៅវិញ គឺបែរជាមានតម្រូវការនៅលើទីផ្សារអន្តរជាតិ ។
លោកឧកញ៉ាបន្តថាយ៉ាងណាក្ដី បើទោះបីជាមាននទីផ្សារ សម្រាប់ផលិតផលមួយចំនួនក៏តម្លៃនៃការលក់ចេញ នៅមានកម្រិត តែវាក៏ល្អប្រសើរ ដែលអាចលក់ចេញទៅក្រៅបាន ។
កម្ពុជាបានសម្រេចនូវការចរចាពាណិជ្ជកម្មសេរី ជាមួយប្រទេសធំៗមួយចំនួន ដើម្បីបើកច្រកនាំចេញផលិតផលរបស់ខ្លួន ទៅកាន់ទីផ្សារទាំងនោះ ដូចជា ទីផ្សារប្រទេសចិន និងទីផ្សាប្រទេសកូរ៉េ ហើយកម្ពុជា ក៏មានគម្រោងចរចាពាណិជ្ជកម្មសេរីជាមួយប្រទេសជាច្រើនទៀតដែលមានទីផ្សារធំៗផងដែរ៕