ដោយៈសុខុម
វៀតណាម: ប្រភពបានទម្លាយថា ក្រុមហ៊ុនផលិតរថយន្ត VinFast ដែលជាបុត្រសម្ព័ន្ធរបស់ក្រុមហ៊ុនធំបំផុតរបស់វៀតណាម Vingroup មានហិច្ឆតាធំគ្រោងប្រថុយហក់ចូលក្នុងទីផ្សារសហរដ្ឋអាមេរិក ដើម្បីដណ្ដើមចំណែកទីផ្សារ។ នេះបើយោងតាមសារព័ត៌មាន The Edge Markets ចុះផ្សាយកាលពីថ្ងៃទី៣០ មេសា។
ក្រុមហ៊ុននេះសង្ឃឹមថា រថយន្តអគ្គិសនីប្រភេទ USV និងគម្រោងជួលអាគុយរបស់ខ្លួន នឹងមានលក្ខណសម្បត្តិទាក់ទាញគ្រប់គ្រាន់ ដើម្បីដណ្ដើមអតិថិជនពីក្រុមហ៊ុនផលិតរថយន្តកំពូលៗរបស់សហរដ្ឋអាមេរិក ដូចជាក្រុមហ៊ុន Tesla និង General Motors Co ជាដើម។
ប្រភពដដែលបានឱ្យដឹងទៀតថា ក្រុមហ៊ុនដែលបច្ចុប្បន្ន ជាប់ចំណាត់ថ្នាក់លេខ៥នៅវៀតណាមមួយនេះ គ្រោងចុះបញ្ជីនៅផ្សារហ៊ុនសហរដ្ឋអាមេរិក ហើយតម្លៃសរុបរបស់ក្រុមហ៊ុននេះ អាចនឹងឈានដល់៦០ពាន់លានដុល្លារឯណោះ។
លោកស្រី Nguyen Thi Van Anh នាយកប្រតិបត្តិក្រុមហ៊ុន VinFast បានប្រាប់ទីភ្នាក់ងារព័ត៌មាន Reuters ថា ក្រុមហ៊ុនរបស់លោកស្រី មានគម្រោងហក់ចូលទីផ្សារអាមេរិកខាងជើង និងអឺរ៉ុប នៅឆ្នាំ២០២២ ។
ក្នុងបទសម្ភាសន៍មួយ នៅរោងចក្រដ៏ធំល្វឹងល្វើយរបស់ក្រុមហ៊ុន VinFast ជិតកំពង់ផែក្រុង Haiphong ប្រទេសវៀតណាម លោកស្រី Nguyen Thi Van Anh បានលើកឡើងថា “យើងនឹងហក់ចូលទីផ្សារអាមេរិកខាងជើង សហរដ្ឋអាមេរិក កាណាដា និងអឺរ៉ុប ក្នុងពេលជាមួយគ្នា។ ហើយនៅអឺរ៉ុប យើងនឹងហក់ចូលទីផ្សារអាល្លឺម៉ង់ បារាំង និងហូឡង់។
បង្កើតឡើងក្នុងឆ្នាំ២០១៧ ដោយមនុស្សមួយក្រុម ដែលដឹកនាំដោយអតីតនាយកប្រតិបត្តិក្រុមហ៊ុន General Motors Co ក្រុមហ៊ុននេះ មានគោលដៅប្រកួតប្រជែងលើទំហំរថយន្ត និងតម្លៃ ហើយលោកស្រី Nguyen Thi Van Anh បានពោលសរសើរថា រថយន្ត VinFast “ប្រណីតជាង” រថយន្តដែលមានលក់នៅលើទីផ្សារបច្ចុប្បន្ន។
រថយន្ត VinFast ក៏នឹងភ្ជាប់មកជាមួយនូវគម្រោងជួលអាគុយផងដែរ។ នោះមានន័យថា តម្លៃអាគុយដែលជាផ្នែកដ៏ថ្លៃបំផុតមួយ នៃរថយន្តអគ្គិសនី នឹងមិនរាប់បញ្ចូលក្នុងតម្លៃចុងក្រោយឡើយ ដែលធ្វើឱ្យរថយន្ដមានតម្លៃធូរថ្លៃច្រើនជាងធម្មតា។
យោងតាមបទបង្ហាញរបស់ក្រុមហ៊ុនបង្ហាញថា រថយន្ត VinFast នឹងមានតម្លៃធូរថ្លៃជាងរថយន្តអគ្គិសនីផ្សេងៗទៀត។
ជាទូទៅរថយន្ត SUV របស់ Tesla លក់ក្នុងតម្លៃប្រមាណ៥០.០០០ដុល្លារ ប៉ុន្តែលោកស្រី Nguyen Thi Van Anh ដែលគ្រោងផ្លាស់ទីលំនៅពីក្រុងហាណូយ ទៅរស់នៅរដ្ឋឡូសអែនជើឡេស នៅខែឧសភានេះ ដើម្បីដឹកនាំប្រតិបត្តិការរបស់ក្រុមហ៊ុននៅសហរដ្ឋអាមេរិក មិនបានបង្ហើបពីតម្លៃរថយន្ត VinFast នោះឡើយ៕
