ដោយៈសុខុម
ញូវយ៉ក: ពិតណាស់ វិបត្តិឆ្លងរាតត្បាតវីរុសកូវីដ-១៩ បានបង្កវិនាសកម្មដ៏សោកសៅទូទាំងពិភពលោក ដោយមនុស្សរាប់លាននាក់បានបាត់បង់ជីវិត ហើយរាប់រយលាននាក់ទៀតបានឆ្លងវីរុសដ៏កាចសាហាវនេះ។
មិនតែប៉ុណ្ណោះ វីរុសនេះក៏បានធ្វើឱ្យសេដ្ឋកិច្ចពិភពលោកដាំក្បាលចុះ អាជីវកម្មនានា ត្រូវបង្ខំចិត្តផ្អាកដំណើរការជាបណ្ដោះអាសន្ន ខ្លះត្រូវប្រកាសក្ស័យធន មនុស្សជាច្រើនបាត់បង់ការងារ គ្មានអ្វីផ្គត់ផ្គង់គ្រួសារ ហើយក្នុងនោះក៏បានធ្វើឱ្យស្ត្រីបាត់បង់ប្រាក់ចំណូលយ៉ាងច្រើនសន្ធាប់មិននឹកស្មានដល់ផងដែរ។
យោងតាមសារព័ត៌មាន CNN ចុះផ្សាយកាលពីថ្ងៃ២៩ មេសាឱ្យដឹងថា របាយការណ៍សិក្សាថ្មីមួយរបស់អង្គការ Oxfam International បានបង្ហាញគួរឱ្យភ្ញាក់ផ្អើលថា នៅទូទាំងពិភពលោក ស្ត្រីបានបាត់បង់ប្រាក់ចំណូលយ៉ាងតិច៨០០ពាន់លានដុល្លារ ក្នុងឆ្នាំ២០២០ ។
អង្គការនេះនិយាយថា “ទំហំទឹកប្រាក់នេះ គឺច្រើនជាងផលិតផលក្នុងស្រុកសរុប (GDP) នៃប្រទេសចំនួន៩៨រួមបញ្ចូលគ្នាទៅទៀត” ។
លោកស្រី Gabriela Bucher នាយកប្រតិបត្តិអង្គការ Oxfam International ថ្លែងថា ការបាត់បង់ប្រាក់ចំណូលសរុបនេះ មិនទាន់បានរាប់បញ្ចូល “ប្រាក់ឈ្នួលដែលស្ត្រីរាប់លាននាក់ ធ្វើការនៅក្នុងសេដ្ឋកិច្ចក្រៅប្រព័ន្ធ ដូចជា ស្ត្រីបម្រើការងារតាមផ្ទះ អាជីវករលក់ដូរនៅទីផ្សារ និងកម្មករកាត់ដេរ” ផងទេ។
លោកស្រីលើកឡើងបន្ថែមទៀតថា “វិបត្តិកូវីដ-១៩ បានធ្វើឱ្យប៉ះពាល់យ៉ាងខ្លាំងដល់ប្រាក់ចំណូល របស់ស្ត្រីនៅក្នុងកម្លាំងការងារ” ។
យោងតាមអង្គការ Oxfam International ឱ្យដឹងថា នៅទូទាំងពិភពលោក ស្ត្រីបានបាត់បង់ការងារចំនួន៦៤លានកន្លែង ក្នុងឆ្នាំ២០២០ ដែលស្មើនឹង៥%នៃការងារទាំងអស់ដែលស្ត្រីមាន បើធៀបនឹងការបាត់បង់ការងារ៣,៩%សម្រាប់បុរស៕