ដោយៈសុខុម
ក្រុងម៉ានីល: សារព័ត៌មាន The Edge Markets បានចុះផ្សាយកាលពីថ្ងៃទី២៨ មេសាថា ប្រហែលពាក់កណ្តាលនៃកាស៊ីណូអនឡាញ ជាង៦០នៅក្នុងប្រទេសហ្វីលីពីន បានបិទដំណើរការជាអចិន្ត្រៃយ៍ ដោយសារវិធានការទប់ស្កាត់ការឆ្លងរាតត្បាតវីរុសកូវីដ-១៩ ធ្វើឱ្យបុគ្គលិកជាជនជាតិបរទេស ដល់ទៅ៣០.០០០នាក់ត្រូវបាត់បង់ការងារ។
ក្នុងសន្នីសីទសារព័ត៌មានតាម Video Call លោកស្រី Andrea Domingo ប្រធានក្រុមហ៊ុនកាស៊ីណូ Philippine Amusement & Gaming Corp លើកឡើងថា ប្រាក់ចំណូលពីល្បែងរបស់កាស៊ីណូ លោកស្រីអាចនឹងធ្លាក់ចុះខ្លាំង មកនៅត្រឹម១៦ពាន់លានប៉េសូ (៧៩៨លានដុល្លារអាមេរិក) នៅឆ្នាំនេះ បើធៀបនឹងប្រមាណ៣០ពាន់លានប៉េសូ (១.៤៩៦លានដុល្លារអាមេរិក) ក្នុងឆ្នាំ២០២០ ខណៈវិធានការយ៉ាងតឹងរ៉ឹងដើម្បីទប់ស្កាត់ការឆ្លងរាតត្បាតវីរុសកូវីដ-១៩នៅតែបន្តអនុវត្តន៍។
លោកស្រីថ្លែងថា ប្រាក់ចំណូលពីកាស៊ីណូអនឡាញ ដែលភាគច្រើនទទួលបានតែភ្ញៀវជនជាតិចិន ទំនងជាទទួលបានតិចជាងពាក់កណ្ដាល នៃប្រាក់ចំណូលជាធម្មតាចន្លោះពី៨ពាន់លានប៉េសូ (៣៩៨លានដុល្លារអាមេរិក) ទៅ៩ពាន់លានប៉េសូ (៤៤៨លានដុល្លារអាមេរិក)។ លោកស្រីថា កាស៊ីណូអនឡាញខ្លះ បានបើកដំណើរការឡើងវិញកាលពីខែធ្នូ។
ទាក់ទិនបុគ្គលិកកាស៊ីណូ លោកស្រីនិយាយថា “កម្លាំងការងារពិតជាមានបញ្ហា។ ជនជាតិចិន មកប្រទេសហ្វីលីពីនមិនបានទេ ដូចនេះក៏គ្មានអ្នកភ្នាល់ល្បែងនោះដែរ” ។ លោកស្រីថា បុគ្គលិកកាស៊ីណូ ដែលបានចាកចេញពីប្រទេសហ្វីលីពីន ដើម្បីចូលរួមអបអរសាទរបុណ្យចូលឆ្នាំថ្មីប្រពៃណីចិន ក្នុងឆ្នាំ២០២០ មិនអាចត្រលប់មកវិញបានទេ ដោយសារការបិទខ្ទប់ ហើយបុគ្គលិកក្នុងស្រុកក៏មានមិនគ្រប់គ្រាន់ទៀត។
លោកស្រីគូសបញ្ជាក់ថា កាស៊ីណូមួយចំនួនទំនងជារើចេញ ទៅកាន់ប្រទេសវៀតណាម ប្រទេសមីយ៉ាន់ម៉ា និងប្រទេសម៉ាឡេស៊ី។ ចំណែកឯកាស៊ីណូអនឡាញធំៗប្រហែលជាត្រលប់មកប្រទេសហ្វីលីពីនវិញ នៅពេលការរឹតបន្តឹងការធ្វើដំណើរធូរស្រាល និងមានភាពច្បាស់លាស់ លើសំណើយកពន្ធលើឧស្សាហកម្មស្បែងស៊ីសង។
លោកស្រីបានបន្តថា “វិស័យអចលនទ្រព្យ ក៏ទទួលរងផលប៉ះពាល់ដែរ ដោយសារការបិទខ្ទប់នេះ នៅពេលបុគ្គលិកកាស៊ីណូអនឡាញ រើចេញពីការិយាល័យ និងអគារស្នាក់នៅ” ។
ទោះជាយ៉ាងណា ដើម្បីទប់ការខាតបង់ ទីភ្នាក់ងារគ្រប់គ្រងវិស័យល្បែងស៊ីសងបានស្នើឱ្យក្រុមការងារបិទខ្ទប់ អនុញ្ញាតឱ្យកាស៊ីណូដែលបើកភ្នាល់ល្បែង ផ្ទាល់នៅនឹងកន្លែងដំណើរការពាក់កណ្ដាល នៃសមត្ថភាពរបស់ខ្លួន ក្រោមវិធានការធ្វើចត្តាឡីស័កដ៏តឹងរ៉ឹងនៅក្រុងម៉ានីល៕