ដោយៈសុខុម
ស៊ីដនី: បុត្រសម្ព័ន្ធមួយរបស់ក្រុមហ៊ុន ផ្ដល់សេវាហិរញ្ញវត្ថុពហុជាតិសាសន៍ Macquarie Group Ltd បានព្រមព្រៀងទិញយកក្រុមហ៊ុនគ្រប់គ្រងសំរាម Bingo Industries Ltd ក្នុងតម្លៃ១,៧៦ពាន់លានដុល្លារអាមេរិក។ នេះបើយោងយាមសារព័ត៌មាន The Edge Markets ចុះផ្សាយកាលពីថ្ងៃ២៧ មេសា។
ក្រុមហ៊ុនគ្រប់គ្រងសំរាមអូស្ត្រាលី មួយនេះនិយាយថា ប្រាក់ចំណូលរបស់ខ្លួនបានកើនឡើងយ៉ាងឆាប់រហ័ស នៅរយៈពេលប៉ុន្មានឆ្នាំចុងក្រោយនេះ។
ផ្ដើមចេញអាជីវកម្មផលិតធុងសំរាម លក្ខណៈគ្រួសារតូចមួយនៅក្រុងស៊ីដនី ភាគខាងលិចនៃប្រទេសអូស្ត្រាលី ក្រុមហ៊ុន Bingo នៅពេលបច្ចុប្បន្នដំណើរការបណ្តាញកែច្នៃសំរាមធំបំផុត នៅក្នុងរដ្ឋ New South Wales និងរដ្ឋ Victoria។
យោងតាមទិន្នន័យ ដែលប្រមូលបានដោយសារព័ត៌មាន Bloomberg បង្ហាញថា ប្រាក់ចំណូលសុទ្ធរបស់ក្រុមហ៊ុនBingo នៅក្នុងឆ្នាំសារពើពន្ធបញ្ចប់ត្រឹមខែមិថុនា ឆ្នាំ២០២០ បានកើនឡើងជិត៣ដង ដែលមានទំហំទឹកប្រាក់ រហូតដល់ជាង៥១លានដុល្លារអាមេរិក។
នេះមិនមែនជាក្រុមហ៊ុនដំបូងនោះឡើយ ដែលក្រុមហ៊ុនបុត្រសម្ព័ន្ធ Macquarie Infrastructure and Real Assets បានទិញយកនៅក្នុងឧស្សាហកម្មគ្រប់គ្រងសំរាម។
ការវិនិយោគមុនៗ របស់ក្រុមហ៊ុននេះរួមមាន GFL Environmental Inc ដែលជាក្រុមហ៊ុនប្រមូលសំរាមធំមួយនៅទ្វីបអាមេរិកខាងជើង និងក្រុមហ៊ុន Wheelabrator Technologies Inc ដែលបំប្លែងសំរាមក្នុងទីក្រុង ទៅជាថាមពលនៅសហរដ្ឋអាមេរិក ផងដែរ៕
