ដោយៈគង់ ម៉ាលីនណា
ភ្នំពេញៈ អគ្គរដ្ឋបាលគយនៃប្រទេសចិន នៅថ្ងៃទី ២៦ ខែមេសាកន្លងមកនេះ បានប្រកាសជាផ្លូវការនូវបញ្ជីឈ្មោះចំការស្វាយ និងរោងចក្រវេចខ្ចប់ដែលបានចុះបញ្ជីសម្រាប់ការនាំចេញផ្លែស្វាយកម្ពុជាទៅកាន់ប្រទេសចិន។
ការប្រកាសនេះបានន័យថា គឺជាការបញ្ចប់នូវនីតិវិធីចុងក្រោយបំផុតនៃការនាំផ្លែស្វាយកម្ពុជាទៅប្រទេសចិនដោយភាគីទាំងពីរ ខណៈមានចម្ការស្វាយចំនួន៣៧ និងរោងចក្រវេចខ្ចប់ចំនួន៥ ដែលបានចុះបញ្ជីលើកនេះ សម្រាប់នាំចេញផ្លែស្វាយកម្ពុជាទៅប្រទេសចិន។
រោងចក្រវេចខ្ចប់ទាំង ៥ ខាងលើរួមមាន៖ ក្រុមហ៊ុន Hyundai Mao Legacy;ក្រុមហ៊ុនShangda Jian hui International Agriculture Product and Logistic;ក្រុមហ៊ុនAl Jazeelan Food;ក្រុមហ៊ុនLong Wo Agriculture (Cambodia)និងក្រុមហ៊ុនBoeung Ket Fresh Fruits។
កាលពីខែមិថុនាឆ្នាំ ២០២០កន្លងមកប្រទេសកម្ពុជា និងចិនបានចុះហត្ថលេខាកិច្ចព្រមព្រៀងលើពិធីសារស្តីពី “លក្ខខណ្ឌតម្រូវភូតគាមអនាម័យ សម្រាប់ការនាំចេញផ្លែស្វាយស្រស់ពីកម្ពុជាទៅកាន់ប្រទេសចិន” ។
នៅថ្ងៃទី១០ខែមិនាឆ្នាំ២០២១ ភាគីចិន បានបើកកិច្ចប្រជុំតាមប្រព័ន្ធវីដេអូ ធ្វើការត្រួតពិនិត្យជាផ្លូវការ ចំពោះការស្នើសុំចុះបញ្ជីនូវចំការស្វាយ និងរោងចក្រវេចខ្ចប់សម្រាប់ការនាំចេញផ្លែស្វាយកម្ពុជាទៅកាន់ប្រទេសចិន។
រដ្ឋបាលគយនៃប្រទេសចិន ត្រួតពិនិត្យហើយអនុម័ត និងបានប្រកាសយល់ព្រមជាផ្លូវការ។ ផ្លែស្វាយកម្ពុជាបានក្លាយជាផ្លែឈើស្រស់ទី២ ដែលអាចនាំចេញទៅប្រទេសចិនដោយផ្ទាល់បន្ទាប់ពីផ្លែចេក។
នេះគឺជាសមិទ្ធិផលដ៏សំខាន់មួយទៀត នៃកិច្ចសហប្រតិបត្តិការជាក់ស្តែងរវាងប្រទេសកម្ពុជា និងចិន ក្រោមបរិបទនៃការរីករាលដាលនៃជំងឺកូវីដ១៩នេះ ហើយវានឹងជម្រុញកិច្ចសហប្រតិបត្តិការ ដែលមានផលប្រយោជន៍ទៅវិញទៅមក នៅក្នុងវិស័យកសិកម្មរវាងកម្ពុជានិងចិនបន្ថែមទៀត៕