ដោយៈ វឌ្ឍនៈ
តូក្យូៈ ដូចយើងបានដឹងរួចមកហើយថា ក្រុមហ៊ុន Tesla របស់កំពូលមហាសេដ្ឋី Elon Musk ទទួលបានភាពជោគជ័យយ៉ាងខ្លាំងគួរឱ្យភ្ញាក់ផ្អើល នៅក្នុងការផលិតលក់រថយន្តអគ្គិសនី និងមានឈ្មោះរន្ទឺពាសពេញពិភពលោក។
ភាពល្បីល្បាញ និងភាពជោគជ័យខ្លាំងរបស់ក្រុមហ៊ុនសហរដ្ឋអាមេរិក មួយនេះបានធ្វើឱ្យក្រុមហ៊ុនផលិតរថយន្តផ្សេងៗ និងជាពិសេសក្រុមហ៊ុនបច្ចេកវិទ្យាទូទាំងពិភពលោកជ្រួលជ្រើម ហក់ចូលប្រឡូកក្នុងឧស្សាហកម្មផលិតរថយន្តអគ្គិសនី ដើម្បីដណ្ដើមចំណែកទីផ្សារ ហើយក្នុងនោះក៏រួមមានទាំងក្រុមហ៊ុន Honda ផងដែរ។
Honda ដែលជាក្រុមហ៊ុនផលិតរថយន្តខ្នាតយក្សរបស់ជប៉ុន បានប្រកាសកាលពីថ្ងៃសុក្រ ទី២៣ មេសាថា ខ្លួនបានកំណត់គោលដៅ ផលិតរថយន្តអគ្គិសនីឱ្យបាន១០០%សម្រាប់លក់នៅលើទីផ្សារ នៅទូទាំងពិភពលោកនៅត្រឹមឆ្នាំ២០៤០ ដើម្បីចូលរួមចំណែ កជួយសង្គ្រោះបរិស្ថាន។ នេះបើយោងតាមការចុះផ្សាយរបស់សារព័ត៌មាន CNA។
លោក Toshihiro Mibe ដែលជានាយកប្រតិបត្តិទើបតែងតាំងថ្មី របស់ក្រុមហ៊ុននេះបានលើកឡើងថា គោលដៅនេះពិតជាមិនងាយស្រួលឡើយ ប៉ុន្តែក្រុមហ៊ុនចង់ “កំណត់គោលដៅឱ្យខ្ពស់” ។
ក្រុមហ៊ុន Honda និយាយថា ខ្លួនចង់ផលិតរថយន្តអគ្គិសនី លក់នៅក្នុងទីផ្សារធំៗឱ្យបាន៤០ភាគរយ នៅត្រឹមឆ្នាំ២០៣០ និង៨០%នៅត្រឹមឆ្នាំ២០៣៥ ហើយ១០០%នៅទូទាំងពិភពលោកត្រឹមឆ្នាំ២០៤០ ។
ក្រុមហ៊ុននេះបានបោះទុនរហូតដល់ទៅ៥ទ្រីលានយ៉េន (៤៦ពាន់លានដុល្លារអាមេរិក) វិនិយោគលើការស្រាវជ្រាវ និងការអភិវឌ្ឍរបស់ខ្លួន ដើម្បីឈានទៅដល់គោលដៅដែលបានកំណត់។
ការប្រកាសនេះ បានធ្វើឡើងមួយថ្ងៃ ក្រោយពីលោកនាយករដ្ឋមន្ត្រីជប៉ុន លោក Yoshihide Suga ថ្លែងថា ប្រទេសជប៉ុន មានបំណងកាត់បន្ថយការបំភាយឧស្ម័នពុលចូលទៅក្នុងបរិយាកាស ឱ្យបាន៤៦%នៅត្រឹមឆ្នាំ២០៣០ ដោយចំនួននេះ លើសពីការប្ដេជ្ញាចិត្តលើកមុន ដែលមានត្រឹម២៦%ពីឆ្នាំ២០១៣ដល់ឆ្នាំ២០៣០ ។
ការប្ដេជ្ញាចិត្តនេះធ្វើឡើង ស្របពេលលោកប្រធានាធិបតីសហរដ្ឋអាមេរិក លោក ចូ បៃឌិន ធ្វើជាម្ចាស់ផ្ទះទទួលជំនួបកំពូលមួយ ដើម្បីជំរុញឱ្យមានវិធានការកាន់តែម៉ឺងម៉ាត់លើបញ្ហាបម្រែបម្រួលអាកាសធាតុ ឆ្ពោះទៅកាន់ការកាត់បន្ថយការបំភាយឧស្ម័នឱ្យមកនៅកម្រិតសូន្យនៅទីបំផុត៕