ដោយៈសុខុម
ប៉េកាំង: ប្រធានាធិបតីចិន លោក ស៊ី ជីនភីង កាលពីថ្ងៃអង្គារ ទី២០ ខែមេសា បានចំអកឱ្យសហរដ្ឋអាមេរិក ចំពោះការប៉ុនប៉ងណាមួយ ដើម្បីបន្សាបឥទ្ធិពលរបស់មហាយក្សចិន ទាំងនៅក្នុងតំបន់ និងពិភពលោក ហើយបានសង្កត់ធ្ងន់ថា “សង្គ្រាមត្រជាក់ថ្មី” នឹងធ្វើឱ្យខាតបង់ ប្រយោជន៍នៃសេដ្ឋកិច្ចពិភពលោក។ នេះបើយោងតាមការចុះផ្សាយរបស់សារព័ត៌មាន The Jakarta Post។
អំឡុងពេលថ្លែងសុន្ទរកថាតាម Video Conference នៅឯវេទិកាអាស៊ីក្រុងប៉អៅ (Boao Forum for Asia) លោក ស៊ី បានលើកឡើងថា ប្រទេសចិន នឹងចូលរួម “សកម្ម” ក្នុងកិច្ចសហប្រតិបត្តិការពហុភាគី ក្នុងវិស័យពាណិជ្ជកម្ម ហើយចូលរួមចំណែកដល់ការកសាង “ប្រព័ន្ធសេដ្ឋកិច្ចបើកទូលាយកម្រិតខ្ពស់ថ្មី” មួយ ដោយជំរុញឱ្យសហរដ្ឋអាមេរិក កុំប្រកាន់ខ្ជាប់គោលនយោបាយគាំពារនិយមផ្នែកពាណិជ្ជកម្ម។
លោក ស៊ី បានបន្ថែមទៀតថា “ខណៈបណ្ដាប្រទេសប្រជាធិបតេយ្យ ដែលមានសម្ព័ន្ធភាពជិតស្និទ្ធនឹងសហរដ្ឋអាមេរិក អាចនឹងត្រូវបានបំបែកឱ្យចេញកាន់តែឆ្ងាយពីបណ្ដាប្រទេស ដែលមានសម្ព័ន្ធភាពជិតស្និទ្ធនឹងចិនកុម្មុយនីស្ត រដ្ឋាភិបាលក្រុងប៉េកាំង “ជំទាស់ដាច់ខាតចំពោះសង្គ្រាមត្រជាក់ និងមនោគមវិជ្ជាប្រឈមមុខដាក់គ្នាក្នុងគ្រប់ទម្រង់”។
លោកបានសង្កត់ធ្ងន់ថា ច្បាប់ដែលបង្កើតឡើងដោយប្រទេសមួយ ឬប្រទេសមួយក្រុម មិនអាចយកមកអនុវត្តលើប្រទេសដទៃបានឡើយ។ ប្រទេសចិន មិនដែលស្វះស្វែងចង់បានឥទ្ធិពលលប់លើសគេឯង ហើយព្យាយាមពង្រីកឥទ្ធិពល ឬក៏ចង់ប្រកួតប្រជែងផ្នែកសព្វាវុធនោះឡើយ។
លោកស៊ី បានថ្លែងបែបនេះនៅប៉ុន្មានថ្ងៃ ក្រោយពីប្រធានាធិបតីសហរដ្ឋអាមេរិក លោក ចូ បៃឌិន និងនាយករដ្ឋមន្ត្រីជប៉ុន លោក Yoshihide Suga ក្នុងជំនួបកំពូលរបស់ពួកលោកនៅរដ្ឋធានីវ៉ាស៊ីតោន បានសង្កត់ធ្ងន់អំពីសារៈសំខាន់នៃសន្តិភាព និងស្ថិរភាពនៅច្រកសមុទ្រតៃវ៉ាន់ Taiwan Strait ដែលបានធ្វើឱ្យរដ្ឋាភិបាលក្រុងប៉េកាំង ខឹងឆេះដុំ។
នោះក៏ព្រោះតែរដ្ឋាភិបាលក្រុងប៉េកាំង តែងតែចាត់ទុកកោះវ៉ាន់ ដែលគ្រប់គ្រងអធិបតេយ្យភាពដោយខ្លួនឯងថា ជាខេត្តមួយរបស់ខ្លួន គឺរង់ចាំតែការបង្រួបបង្រួមជាតិប៉ុណ្ណោះ ហើយបើក្នុងករណីចាំបាច់ អាចនឹងឈានទៅដល់ការប្រើកម្លាំងបាយ។
ក្នុងជំនួបផ្ទាល់លើកដំបូងរបស់ពួកលោក កាលពីថ្ងៃសុក្រ សប្ដាហ៍មុន លោក ចូ បៃឌិន និងលោក Yoshihide Suga ក៏បានសម្ដែងការព្រួយបារម្ភ អំពីបញ្ហារំលោភសិទ្ធិមនុស្សរបស់ចិន នៅតំបន់ស្វយ័តស៊ីនជាំង (Xinjiang) ការបង្ក្រាបលើបាតុករដោយហិង្សានៅក្រុងហុងកុង និងបញ្ហាសន្តិសុខនៅដែនទឹករបស់កោះតៃវ៉ាន់ និងដែនទឹកក្បែរៗនោះផងដែរ។
ទោះបីជាមិនលើកឡើងពីបញ្ហា ឬបញ្ចេញឈ្មោះសហរដ្ឋអាមេរិក ឱ្យចំៗក្នុងសុន្ទរកថារបស់ខ្លួនក្ដី ក៏លោកស៊ី បាននិយាយបែបផ្លែផ្កាថា “ចាស់គំរឹលណាស់ ខ្លួនឯងដើរណែនាំប្រទេសដទៃ ដោយភាពក្រអឺតក្រទម ហើយខ្លួនឯងបែរជាជ្រៀតជ្រែតចូលកិច្ចការផ្ទៃក្នុងរបស់ប្រទេសទាំងនោះ” នៅពេលដែលប្រទេសមួយចង់ចុះសម្រុង ជាមួយប្រទេសដទៃ។
ក្នុងពេលជាមួយគ្នានេះ លោក ស៊ី បានប្ដេជ្ញាពង្រឹងកិច្ចសហប្រតិបត្តិការអន្តរជាតិក្នុងវិស័យបច្ចេកវិទ្យាបញ្ញាសិប្បនិមិត្ត (AI) និងជីវឱសថ (Biomedicine) ក្នុងកិច្ចប្រឹងប្រែងទប់ការឆ្លងរាតត្បាតវីរុសកូវីដ-១៩ ហើយក៏បានប្ដេជ្ញាប្រឹងប្រែង ចូលរួមដោះស្រាយបម្រែបម្រួលអាកាសធាតុផងដែរ៕
