ដោយៈសុខុម
ប្រទេសចិន: អាស៊ី គួរតែជាក្បាលម៉ាស៊ីនដ៏សំខាន់ សម្រាប់ជំរុញការងើបឡើងនៃសេដ្ឋកិច្ចពិភពលោកប្រកបដោយនិរន្តរភាព។ នេះបើយោងតាមរបាយការណ៍សិក្សាមួយដែលវេទិកាអាស៊ីក្រុងប៉អៅ (Boao Forum for Asia) បានចេញផ្សាយកាលពីថ្ងៃអាទិត្យ ទី១៨ មេសា។
របាយការណ៍របស់វេទិកាអាស៊ីក្រុងបូអៅ ដែលមានឈ្មោះថា “Sustainable Development: Asia and the World Annual Report 2021” (ការអភិវឌ្ឍន៍ប្រកបដោយនិរន្តភាព: របាយការណ៍ស្ដីពីអាស៊ី និងពិភពលោកប្រចាំឆ្នាំ២០២១) បានលើកឡើងថា បណ្តាប្រទេសនៅអាស៊ី ដែលបានងើបឡើងពីវិបត្តិឆ្លងរាតត្បាតវីរុសកូវីដ-១៩ ចាំបាច់ត្រូវផ្តល់ជំនួយបន្ថែមដល់ប្រទេសជិតខាងនានារបស់ខ្លួន។
របាយការណ៍នេះបានបន្តថា ប្រទេសទាំងនោះ ចាំបាច់ត្រូវខិតខំប្រឹងប្រែងរួមគ្នាក្នុងសកម្មភាពទប់ស្កាត់ និងគ្រប់គ្រងវីរុសកូវីដ-១៩ ហើយពន្លឿនដំណើរការចាក់វ៉ាក់សាំង។ការធ្វើដូចនេះ នឹងផ្ដល់លទ្ធភាពសម្រាប់ការបើកព្រំដែន និងការអនុញ្ញាតឱ្យធ្វើដំណើរបានធម្មតាឡើងវិញ។
កិច្ចព្រមព្រៀងស្ដីពី ភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងភាពជាដៃគូអន្តរប៉ាស៊ីហ្វិក ប្រកបដោយភាពគ្រប់ជ្រុងជ្រោយ និងវឌ្ឍនភាព (CPTPP) គួរតែត្រូវបានអនុវត្តជាវិធាន និងការអនុវត្តស្តង់ដារខ្ពស់សម្រាប់ពាណិជ្ជកម្ម និងការវិនិយោគសេរី។
ធនាគារអភិវឌ្ឍន៍អាស៊ី (ADB) ធនាគារវិនិយោគហេដ្ឋារចនាសម្ព័ន្ធអាស៊ី (AIIB) ធនាគារអភិវឌ្ឍន៍ថ្មី (New Development Bank) ស្ថាប័ន និង Platform ហិរញ្ញវត្ថុសម្រាប់ការអភិវឌ្ឍន៍ថ្នាក់តំបន់ដទៃទៀត គួរតែបន្ធូរបន្ថយបទប្បញ្ញត្តិមួយចំនួនអំឡុងវិបត្តិសេដ្ឋកិច្ច ហើយសហការយ៉ាងជិតស្និទ្ធជាមួយបណ្ដាស្ថាប័នហិរញ្ញវត្ថុ និងមូលនិធិនៅអាស៊ី ដែលយកចិត្តទុកដាក់ចំពោះការវិនិយោគបៃតង រយៈពេលវែង និងមធ្យម។
អាស៊ី គួរតែទាញយកអត្ថប្រយោជន៍ពីនវានុវត្តន៍ថ្មី និងការអភិវឌ្ឍបច្ចេកវិទ្យាឌីជីថល ដើម្បីធានាបាននូវសង្វាក់ផ្គត់ផ្គង់ដោយរលូននៅក្នុងតំបន់ លើកកម្ពស់ការកសាង និងការដំណើរការហេដ្ឋារចនាសម្ព័ន្ធឆ្លងដែន ហើយលើកកម្ពស់ការវិនិយោគបៃតង និងការផ្លាស់ប្តូរទៅរកឌីជីថល។
លើសពីនេះ បណ្តាប្រទេសនៅអាស៊ី ត្រូវពង្រឹងកិច្ចសហប្រតិបត្តិការរបស់ខ្លួនបន្ថែមទៀត ជាមួយបណ្តាប្រទេសកំពុងអភិវឌ្ឍន៍ដទៃទៀត ជាពិសេសប្រទេសនានានៅទ្វីបអាហ្វ្រិក ព្រមទាំងចែករំលែកបទពិសោធន៍ និងកសាងសមត្ថភាពរបស់ខ្លួននៅក្នុងវិស័យមួយចំនួន៕