ដោយៈ សាវុធ
ភ្នំពេញៈ ស្ថាប័នរដ្ឋ និងឯកជនបង្ហាញសកម្មភាពរួមគ្នា ទប់ស្កាត់ការដំឡើងថ្លៃម្ហូបអាហារ ពិសេសអង្ក ដើម្បីជួយសម្រាលទុក្ខលំបាករបស់ប្រជាពលរដ្ឋ ក្នុងពេលបិទខ្ទប់ នៅក្នុងភូមិសាស្ត្ររាជធានីភ្នំពេញ និងក្រុងតាខ្មៅ។
សហព័ន្ធស្រូវអង្ករកម្ពុជា នៅថ្ងៃទី១៨ ខែមេសា ឆ្នាំ២០២១នេះ បានចេញសេចក្តីប្រកាសព័ត៌មាន អំពីការលក់អង្ករបញ្ចុះតម្លៃ ក្នុងពេលដែលប្រជាពលរដ្ឋ កំពុងជួបការលំបាកក្នុងពេលអនុវត្តវិធានការបិទខ្ទប់ នៅក្នុងភូមិសាស្ត្ររាជធានីភ្នំពេញ និងក្រុងតាខ្មៅ។
ជាមួយគ្នានេះដែរ ក្រុមការងាររបស់ក្រសួងពាណិជ្ជកម្ម កាលថ្ងៃទី១៦ ខែមេសា ឆ្នាំ២០២១នេះ បានចុះពិនិត្យតាមដានថ្លៃទំនិញ និងសុំឲ្យអាជីវករបិទស្លាកថ្លៃ និងកុំដំឡងថ្លៃ នៅតាមផ្សារធំៗក្នុងរាជធានីភ្នំពេញ។
សហព័ន្ធស្រូវអង្ករកម្ពុជាបានឲ្យដឹងថា បន្ថែមលើយន្តការនៃការទប់ស្កាត់ ការដំឡើងថ្លៃម្ហូបអាហារ ជាពិសេស «អង្ករ» ដែលក្រុមហ៊ុនហ្គ្រីនត្រេដ នៃក្រសួងពាណិជ្ជកម្ម និងសហព័ន្ធស្រូវអង្ករកម្ពុជា ដែលបានដាក់ចេញ និងកំពុងបន្តអនុវត្ត តាំងពីថ្ងៃទី១៥ ខែមេសា ឆ្នាំ២០២១កន្លងមក មានសមាជិកសហព័ន្ធស្រូវអង្ករកម្ពុជា មួយចំនួនទៀត ដែលមានដេប៉ូលក់រាយ ដែលនៅមានសន្និធិ និងអាចដំណើរការក្នុងតំបន់បិទខ្ទប់ សម្រេចចិត្តចូលរួមជាមួយរាជរដ្ឋាភិបាល ដោយយល់ព្រមបញ្ចុះថ្លៃអង្ករបន្ថែមទៀត។
សហព័ន្ធស្រូវអង្ករបានបន្តថា ការបញ្ចុះតម្លៃនេះមានចាប់ពីចំនួន ២០០ ០០០ រៀល (ម្ភៃម៉ឺនរៀល) ទៅ ៤០០ ០០០ រៀល ( សែមស៊ិប ម៉ីនរៀល) (ក្នុងមួយតោន ឬស្មើនឹង ១០ ០០០ (មួយម៉ឺនរៀល) ទៅ ២០ ០០០(ពីរម៉ីនរៀល) ក្នុងមួយបេ សម្រាប់ទម្ងន់៥០គីឡូក្រាម ទៅតាមប្រភេទ និងស្តង់ដាបទដ្ឋានគុណភាពអង្ករ ដែលមាននៅក្នុងស្តុក ចាប់ពីពេលនេះតទៅ រហូតដល់ស្ថានការណ៍បានធូរស្បើយឡើងវិញ។ សមាជិកបន្ថែមទៀត នឹងចូលរួមជាបន្តរបន្ទាប់នៅពេលដែលបុគ្គលិក កម្មករនិងចំនួនសន្និធិអង្ករថ្មី អាចចរាចរណ៍ចូលមកដល់ដេប៉ូ ក្នុងតំបន់បិទខ្ទប់បាន។
មន្ដ្រីជំនាញអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) និងក្រុមការងារ នៃក្រសួងពាណិជ្ជកម្ម នៅថ្ងៃទី១៦ ខែមេសា ឆ្នាំ២០២១នេះ បានចុះពិនិត្យតាមដានថ្លៃទំនិញ និងសុំឲ្យអាជីវករបិទស្លាកថ្លៃ និងកុំដំឡងថ្លៃ នៅតាមផ្សារធំៗក្នុងរាជធានីភ្នំពេញ។
លោកប៉ែន សុវិជាតិអនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានថ្លែងថា ក្នុងឱកាសចុះត្រួតពិនិត្យ តាមដានថ្លៃទំនិញ ខាងលើនេះ ក្រុមការងារ ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានសហការ ជាមួយមន្ទីរ ចុះត្រួតពិនិត្យតាមផ្សារធំៗ ចំនួន៣ផ្សារ រួមមាន៖ ផ្សារធំថ្មី ផ្សារច្បារអំពៅ និងផ្សារសំហាន។
លោកបន្តថា ចំពោះផ្សារថ្មី មន្ដ្រីការពារអ្នកប្រើប្រាស់ កិច្ចការប្រកួតប្រជែង និងប ង្ក្រាបការក្លែងបន្លំ បានចុះរួចហើយ ដោយបានណែនាំ ដល់អាជីវករបិទស្លាកថ្លៃ លើមុខទំនិញ និងមិនអនុញ្ញាត ឲ្យដំឡើងថ្លៃហួសហេតុទេ។
បើតាមមន្ដ្រីជំនាញបានឲ្យដឹងថា ពេលចុះអង្កេតពិនិត្យ ឃើញទំនិញមួយចំនួន រក្សាតម្លៃដូចមុនបិទខ្ទប់ មួយចំនួនឡើងបន្តិចបន្តួចដូចជា៖ ស្ពៃក្តោប និងស្ពៃបូកគោ តម្លៃ៤០០០រៀល ឡើង១០០០រៀល និងសាច់គោចំឡក ១គីឡូក្រាម តម្លៃ៤៥,០០០រៀល -ល- ។
ទន្ទឹមនោះ មន្ដ្រីការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានឲ្យដឹងទៀតថា អាហារសមុទ្រ ពុំបានឡើងថ្លៃទេ ហើយក៏ពុំមានអតិថិនទិញផងដែរ ដែលធ្វើអ្នកលក់ត្អូញ ពីការលក់មិនសូវដាច់។
កាលពីថ្ងៃទី១៥ ខែមេសា ឆ្នាំ២០២១នេះថា ក្រសួងពាណិជ្ជកម្ម ចាប់ផ្ដើមប្រតិបត្ដិការលក់ អង្ករ និងមី ចល័តក្នុងរាជធានីភ្នំពេញ ដើម្បីជួយសម្រួលដល់ប្រជាពលរដ្ឋ។
រយៈពេល៣ថ្ងៃ ពោលចាប់ពីថ្ងៃទី១៥-១៦-១៧ ខែមេសា ឆ្នាំ២០២១ រថយន្ដចល័តរបស់ក្រសួងពាណិជ្ជកម្ម លក់អង្ករបានសរុបចំនួន១៦៣បាវ និងមីជាតិចំនួន១១៣១កេស ស្របពេលរាជរដ្ឋាភិបាល ដាក់ចេញវិធានការបិទខ្ទប់ ក្នុងភូមិសាស្ត្ររាជធានីភ្នំពេញ និងក្រុងតាខ្មៅ៕
