ដោយៈសុខុម
គូឡាឡាំពួរៈ ការសិក្សាថ្មីមួយធ្វើឡើង ដោយធនាគារយក្សអង់គ្លេស Standard Chartered បង្ហាញថា រាល់ក្រុមហ៊ុនចំនួន៥នៅក្នុងតំបន់អាស៊ាន គឺមាន៣ក្រុមហ៊ុនទៅហើយដែលធ្វើសកម្មភាពយឺតយ៉ាវ នៅក្នុងការផ្លាស់ប្តូរឆ្ពោះទៅរកគោលដៅ កាត់បន្ថយការបំភាយឧស្ម័នកាបូនឱ្យមកនៅកម្រិតសូន្យ។ នេះបើយោងតាមសារព័ត៌មាន The Edge Markets ចុះផ្សាយកាលពីថ្ងៃទី១២ មេសា។
សកម្មភាពយឺតយ៉ាវនេះ អាចធ្វើឱ្យគោលដៅកាត់បន្ថយ ការបំភាយឧស្ម័នកាបូន ឱ្យមកនៅកម្រិតសូន្យត្រឹមឆ្នាំ២០៥០ ដូចមានចែងក្នុងកិច្ចព្រមព្រៀងទីក្រុងប៉ារីស ត្រូវបរាជ័យ។
ការសិក្សាទូទាំងពិភពលោកដែលមានឈ្មោះថា Zeronomics ខាងលើនេះបានរកឃើញថា ៦០%នៃថ្នាក់ដឹកនាំក្រុមហ៊ុន ក្នុងតំបន់អាស៊ានបានបង្ហាញជំនឿថា ក្រុមហ៊ុនរបស់ពួកគេកំពុងធ្វើការផ្លាស់ប្ដូរយឺតយ៉ាវ (ស្មើនឹង៥៥% នៃក្រុមហ៊ុនទូទាំងពិភពលោក)។
ធនាគារ Standard Chartered បានចេញសេចក្តីថ្លែងការណ៍កាលពីថ្ងៃទី១២ មេសា ថា “កង្វះការគាំទ្រពីបណ្ដាវិនិយោគិនផ្ទាល់ នៅក្នុងក្រុមហ៊ុនទាំងនោះ គឺជាឧបសគ្គធំបំផុតដែលរាំងស្ទះ ដល់វឌ្ឍនភាពសម្រាប់ក្រុមហ៊ុននានា នៅក្នុងតំបន់នេះ ជាឧបសគ្គដ៏ធំដែលស្មើនឹង៧៣% (ស្មើនឹង៦០%ទូទាំងពិភពលោក)” ។
នៅក្នុងការស្ទង់មតិក្នុងខែកញ្ញា និងខែតុលា ឆ្នាំ២០២០នេះបានសាកសួរថ្នាក់ដឹកនាំជាន់ខ្ពស់ នៃក្រុមហ៊ុនធំៗចំនួន២៥០ និងអ្នកជំនាញខាងវិនិយោគចំនួន១០០រូបនៅទូទាំងពិភពលោក។
ទោះជាយ៉ាងណា កង្វះការគាំទ្រពីវិនិយោគិន មិនមែនជាឧបសគ្គដែលក្រុមហ៊ុននានានៅក្នុងតំបន់អាស៊ាន ប្រឈមនោះឡើយ។
ធនាគារ Standard Chartered បានលើកឡើងថា “ថ្នាក់ដឹកនាំក្រុមហ៊ុនប្រមាណ៧០% (៦៧%ទូទាំងពិភពលោក) ជឿថា កង្វះហិរញ្ញវត្ថុ កំពុងរារាំងដល់ការផ្លាស់ប្តូរ ចំណែកឯ៧រូប ក្នុងចំណោម១០រូប (ស្មើនឹង៦០% ទូទាំងពិភពលោក) ជឿថា កង្វះការគាំទ្រពីថ្នាក់ដឹកនាំប្រតិបត្តិ គឺជាឧបសគ្គដ៏ធំមួយ” ។
ក្នុងនាមជាប្លុកសេដ្ឋកិច្ចដ៏ធំមួយ នៅក្នុងតំបន់អាស៊ាន ប្រទេសម៉ាឡេស៊ី បានប្តេជ្ញាចិត្តជំរុញរបៀបវារៈបៃតង និងកាត់បន្ថយការបំភាយឧស្ម័នកាបូន ចូលទៅក្នុងបរិយាកាសឱ្យបាន៤៥%នៅត្រឹមឆ្នាំ២០៣០ ៕
