ដោយ: គង់ លាងហួរ
ហាណូយ: យោងតាមទីភ្នាក់ងារវិនិយោគបរទេស (FIA) ក្រោមក្រសួងផែនការ និងវិនិយោគវៀតណាមបានឱ្យដឹងថា ប្រទេសវៀតណាមបានទាក់ទាញលំហូរវិនិយោគ ផ្ទាល់ពីបរទេស(FDI) ប្រមាណ១,៦៩ពាន់លានដុល្លារ នៅក្នុងខែមករា ដោយធ្លាក់ចុះ១៩,៨ភាគរយពីមួយឆ្នាំទៅមួយឆ្នាំ។
នៅក្នុងខែមករា ប្រទេសវៀតណាមបានអនុម័ត គម្រោងវិនិយោគបរទេសថ្មីចំនួន១៥៣ ដែលមានតម្លៃ១,២ពាន់លានដុល្លារ ដែលនេះជាសញ្ញាបញ្ជាក់ទំនុកចិត្តរបស់វិនិយោគិនបរទេស នៅក្នុងបរិយាកាសវិនិយោគរបស់វៀតណាម។
នៅក្នុងអំឡុងខែមករា ដើមទុនដែលត្រូវបានបោះបន្ថែម ទៅក្នុងគម្រោងរបស់វិនិយោគិនបរទេស បានធ្លាក់ចុះ៧៦ភាគរយ ក្នុងមួយឆ្នាំ មកត្រឹម៣០៦,៣លានដុល្លារ ខណៈការរួមចំណែកដើមទុន និងការទិញភាគហ៊ុនរបស់ពួកគេ ក៏ធ្លាក់ចុះ៦១ភាគរយពីមួយឆ្នាំទៅមួយឆ្នាំ មកនៅត្រឹមជាង១៧៤លានដុល្លារផងដែរ។
ទន្ទឹមនឹងនោះ ដើមទុនដែលបានបញ្ចេញ ក៏បានបង្ហាញឱ្យឃើញនូវសញ្ញានៃការធ្លាក់ចុះ១៦,៣ភាគរយ មកនៅត្រឹម១,៣៥ពាន់លានដុល្លារនៅក្នុងខែមករា។
ឧស្សាហកម្មកែច្នៃ និងផលិត ទទួលបានលំហូរវិនិយោគបរទេសក្នុងទំហំទឹកប្រាក់ចំនួន១,០៥ពាន់លានដុល្លារ ដែលស្មើនឹង៧៧,៦ភាគរយនៃចំនួនសរុប។
នៅក្នុងខែមករា បណ្តាប្រទេស និងដែនដីចំនួន២៨ បានបណ្តាក់ទុនវិនិយោគនៅវៀតណាម ក្នុងនោះប្រទេសសិង្ហបុរី ជាវិនិយោគិនធំបំផុត ដែលបានបោះទុន ប្រមាណ៧៦៧,៦លានដុល្លារ តាមពីក្រោយដោយប្រទេសចិន ដែលបានបណ្តាក់ទុនចំនួន១៩៨,២លានដុល្លារ។
ទន្ទឹមនឹងនេះ វិនិយោគិនជនជាតិវៀតណាម បានបោះទុនចំនួន១២៦,៧លានដុល្លារ ទៅក្នុងគម្រោងរបស់ពួកគេនៅក្រៅប្រទេស ពោលគឺកើនឡើង៣,៤ដង ធៀបនឹងខែមករាដូចគ្នា ក្នុងឆ្នាំ២០២២៕