ដោយៈ សាវុធ
ភ្នំពេញៈ ធនាគារពិភពលោក (World Bank) បាននិយាយនៅក្នុងការសិក្សាថ្មីមួយថា បណ្តាប្រទេសនៅអាស៊ីអាគ្នេយ៍ ខាតបង់អស់ទឹកប្រាក់ចំនួន៦ពាន់លានដុល្លារក្នុងមួយឆ្នាំ ដោយសារប្លាស្ទិកដែលប្រើប្រាស់ភាគច្រើន ត្រូវបានបោះចោលជាជាងកែច្នៃឡើងវិញ ខណៈតំបន់នេះអាចទាញឱកាសវិនិយោគ ពីកាកសំណល់នេះបានយ៉ាងច្រើនសម្បើម។
យោងតាមរបាយការណ៍ ដែលបានចេញផ្សាយកាលពីថ្ងៃអង្គារបានឱ្យដឹងថា ប្លាស្ទិក ដែលអាចកែច្នៃឡើងវិញបានជាង៧៥ភាគរយ នៅក្នុងប្រទេសម៉ាឡេស៊ី ថៃ និងហ្វីលីពីនត្រូវបានទុកចោល ខណៈប្លាស្ទិកដែលអាចកែច្នៃឡើងវិញ គឺជា“កាលានុវត្តភាពអាជីវកម្មដេលមិនទាន់មានអ្នកចាប់ឱកាសនេះ” ។ នេះបើយោងតាមការចេញផ្សាយរបស់សារព័ត៌មាន Bloomberg នៅថ្ងៃទី២៣ ខែមីនា ឆ្នាំ២០២១ ។
របាយការណ៍បានបង្ហាញថា ប្រទេសថៃ ដែលមានវិស័យគីមីឥន្ធនៈធំជាងគេនៅអាស៊ីអាគ្នេយ៍ កែច្នៃឡើងវិញនូវចំនួនតូចបំផុត នៃសំណល់ប្លាស្ទិចរបស់ខ្លួន ដែលអត្រាតិចជាង១៨ភាគរយ។ ការសិក្សាបានបង្ហាញថា ខណៈថៃបានបង្ហាញចំណាប់អារម្មណ៍ និងបង្កើនការវិនិយោគ នៅក្នុងរោងចក្រកែឆ្នៃកាកសំណល់បា្លស្ទិក តែក្រុមហ៊ុនមួយចំនួនតូចប៉ុណ្ណោះ ធ្វើការពាក់ព័ន្ធនឹងអាជីវកម្មផលិតជ័រនៅប្រទេសនេះ។
ទាំងនៅក្នុងប្រទេសម៉ាឡេស៊ី និងហ្វីលីពីន នៅក្នុងឧស្សាហកម្មវេចខ្ចប់ និងទំនិញប្រើប្រាស់ កំពុងជ្រើសរើសយកបា្លស្ទិកកែច្នៃឡើងវិញ សម្រាប់ផលិតផលរបស់ពួកគេ។
ទោះយ៉ាងណា អ្នកផ្គត់ផ្គង់ផលិតកែច្នៃឡើងវិញបាន ភាគច្រើនជាសហគ្រាសធុនតូច និងមធ្យម ដែលមិនមានប្រព័ន្ធគ្រប់គ្រង ឬបច្ចេកវិទ្យាគ្រប់គ្រាន់ ដើម្បីបំពេញតម្រូវការ។
លោក Ndiamé Diop នាយកធនាគារពិភពលោកប្រចាំប្រទេសប្រ៊ុយណេ ម៉ាឡេស៊ី ហ្វីលីពីន និងថៃ បានមានប្រសាសន៍ថា “ការសិក្សាទាំងនេះបង្ហាញថា មានឱកាសវិនិយោគ ដែលអាចទាញយកអត្ថប្រយោជន៍ពីបរិស្ថាន និងសេដ្ឋកិច្ច ដោយទាមទារឱ្យមានអន្តរាគមន៍ច្បាស់លាស់ និងបន្ថែមពីវិស័យឯកជន និងសាធារណៈ” ។
ធនាគារពិភពលោកបាននិយាយថា ការកសាងគំរូអាជីវកម្ម សម្រាប់ការកែច្នៃប្លាស្ទិក នឹងជួយបង្វែរកាកសំណល់ពីកន្លែងចាក់សំរាម ដោយកាត់បន្ថយហានិភ័យ នៃផលប៉ះពាលដល់ទឹកទៀតផង។
កាកសំណល់ប្លាស្ទិក មានចំនួនរហូតដល់១៣លានតោន បានហូរចូលមហាសមុទ្រជារៀងរាល់ឆ្នាំ ដោយតំបន់អាស៊ីបានចំណែកជាង៨០ភាគរយនៃកាកសំណល់នេះ។ ប្រទេសហ្វីលីពីន និងថៃ គឺជាប្រទេស ដែលបំពុលបរិស្ថានប្លាស្ទិកអាក្រក់ទីបី និងទី៦ នៅលើពិភពលោករៀងគ្នា។ នេះបើយោងតាមទិន្នន័យរបស់ធនាគារពិភពលោក៕