ភ្នំពេញៈ ករណីរំលាយកិច្ចសន្យាជាឯកតោភាគី បើធ្វើឡើងដោយភាគីនិយោជក ដោយគ្មានការព្រមព្រៀងពីនិយោជិត គេត្រូវមើលថា តើកិច្ចសន្យានេះ ជាកិច្ចសន្យាមានកំណត់ថិរវេលា ឬមិនកំណត់ថិរវេលា?។
ចំពោះករណីកិច្ចសន្យាមានកំណត់ថិរវេលា (មានន័យថា នៅពេលចុះកិច្ចសន្យាការងារ និយោជក និងនិយោជិតបានព្រមព្រៀងគ្នាជាមុនថា កិច្ចសន្យានេះ គឺធ្វើឡើង សម្រាប់រយៈពេលកំណត់ណាមួយ) និយោជកអាចបញ្ឈប់ការងាររបស់និយោជិតនៅមុនពេលកំណត់បាន តែក្នុងករណីពីរប៉ុណ្ណោះ គឺករណីនិយោជិតមានកំហុសធ្ងន់ និងករណីប្រធានស័ក្តិ។
- ករណីនិយោជិតមានកំហុសធ្ងន់៖ ដូចជា លួចឬគៃបំបាត់សហគ្រាស ផ្តល់សញ្ញាប័ត្រក្លែងក្លាយពេលសុំចូលធ្វើការ រំលោភលើការណ៍សម្ងាត់ខាងវិជ្ជាជីវៈ ជេរប្រមាថ ឬប្រព្រឹត្តអំពើហិង្សាទៅលើអ្នកធ្វើការជាមួយគ្នា ឬទៅលើនិយោជក ឬធ្វើបាតុកម្មនយោបាយ នៅក្នុងសហគ្រាស ។ល។ (មាត្រា ៨៣ នៃច្បាប់ការងារ)។
- ករណីប្រធានស័ក្តិ៖ ដូចជា សហគ្រាសត្រូវបិទទ្វារ ទៅតាមបទបញ្ជារបស់អាជ្ញាធរ ឬដោយសារមានគ្រោះមហន្តរាយធម្មជាតិ ។ល។ (មាត្រា ៨៥)។
ក្រៅពីករណីពីរនេះ និយោជកមិនអាចបញ្ឈប់ការងារនិយោជិត មុនពេលកំណត់បានទេ គឺត្រូវតែចាំឲ្យកិច្ចសន្យាត្រូវផុតរលត់ជាធម្មតា នៅពេលដល់កាលកំណត់៕