ដោយៈ លក្ខិណា
ភ្នំពេញៈ ការស្រាវជ្រាវថ្មីមួយរបស់ Women’s World Banking បានទទួលស្គាល់ថា “គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី មិនត្រឹមតែផ្តល់សេវាកម្មល្អ ដល់អតិថិជនរបស់ខ្លួនប៉ុណ្ណោះទេ ថែមទាំងកំពុងលើកកម្ពស់យេនឌ័រ នៅក្នុងប្រទេសកម្ពុជា តាមរយៈការវិនិយោគ លើអ្នកដឹកនាំដែលជាស្ត្រី និងអតិថិជនជាស្ត្រីទៀតផង។
Women’s World Banking ជាអង្គការអន្តរជាតិដែលធ្វើការគាំទ្រ និង វិនិយោគលើដំណោះស្រាយផ្នែកហិរញ្ញវត្ថុ និងគោលនយោបាយនានា ក្នុងប្រទេសកំពុងអភិវឌ្ឍន៍ដើម្បីធានាឱ្យបានស្ថិរភាពសេដ្ឋកិច្ច និងការរីកចម្រើនកាន់តែប្រសើរឡើង សម្រាប់ស្ត្រីលើពិភពលោក បានធ្វើការស្រាវជ្រាវក្នុងពេលថ្មីៗ ហើយរកឃើញថា ការវិនិយោគបុគ្គលិក និងថ្នាក់ដឹកនាំដែលជាស្ត្រី ជាពិសេសអតិថិជនស្ត្រី គឺជា DNA របស់ អេ អឹម ខេ ។ គ្រប់សកម្មភាព ឬគម្រោងរបស់ អេ អឹម ខេ បានផ្តល់អាទិភាពដល់បុគ្គលិកថ្នាក់គ្រប់គ្រងជាស្ត្រី និងការលើកកម្ពស់យេនឌ័រនៅក្នុងស្ថាប័នរបស់ខ្លួន។
អង្គការមួយនេះបានបង្ហាញថា ការលើកកម្ពស់ភាពជាអ្នកដឹកនាំរបស់ស្ត្រីនៅ អេ អឹម ខេ មិនត្រូវបានចាត់ទុកជាបញ្ហាស្ត្រីនោះទេ ។ តែផ្ទុយទៅវិញវាជាការយកចិត្តទុកដាក់ខ្ពស់របស់ស្ថាប័ន។ កត្តានេះ បានក្លាយទៅជាការអភិវឌ្ឍសមត្ថភាព និងវិជ្ជាជីវៈសម្រាប់បុគ្គលិកទាំងអស់ ដោយផ្តោតលើការបណ្តុះបណ្តាល និងការជ្រើសរើសបុគ្គលិកខាងក្នុង ស្ថាប័នដោយមានការបើកទូលាយ ក្នុងការទទួលយកមតិយោបល់ គំនិតច្នៃប្រឌិត ការទំនាក់ទំនងល្អជាមួយបុគ្គលិក និងនាយកដ្ឋាននានាចាប់ពីបុគ្គលិកជួរមុខរហូតដល់ប្រធាននាយកប្រតិបត្តិ” នេះបើយោងតាមរបាយការណ៍របស់ Women’s World Banking ។
របាយការណ៍បានបង្ហាញទៀតថា បើទោះបីជាទំហំកម្ចីរបស់ អេ អឹម ខេ មានការកើនឡើង ស្របពេលដែលការវិនិយោគលើបណ្តាញ និងបច្ចេកវិទ្យាថ្មីៗសម្រាប់ប្រព័ន្ធស្នូលធនាគាររបស់ខ្លួនក្តី ក៏ អេ អឹម ខេ នៅតែប្តេជ្ញាចិត្តខ្ពស់ក្នុងការលើកកម្ពស់ និងវិនិយោគលើស្ត្រី ដែលជាអ្នកដឹកនាំ និងអតិថិជនដដែល ។
លោកស្រី ពាំង ពិសាខ នាយិកាប្រតិបត្តិធនធានមនុស្ស នៃគ្រឹះស្ថានមីក្រូហិរញ្ញវត្ថុ អេ អឹម ខេបានឱ្យដឹងថា អេអឹមខេ គឺជាស្ថាប័នមួយដែលមានវប្បធម៌បើកទូលាយ មានតម្លាភាព មានការច្នៃប្រឌិត និង ការអភិវឌ្ឍ។ បុគ្គលិក អេ អឹម ខេ ទាំងអស់មានការប្តេជ្ញាចិត្តខ្ពស់ក្នុងការទទួលយកគំនិតថ្មីៗ ។ ជាការតបស្នងមកវិញ គ្រឹះស្ថានក៏មានការតាំងចិត្តខ្ពស់ផងដែរ ក្នុងការធ្វើឱ្យមានតម្លាភាព ចំពោះបុគ្គលិកគ្រប់ជាន់ថ្នាក់៕
