ដោយៈ ម៉ាណេត
ភ្នំពេញៈ យោងតាមក្រុមអ្នកវិភាគបានលើកឡើងថា ជាមួយនឹងច្បាប់កម្មសិទ្ធិលំនៅដ្ឋាន សម្រាប់ជនបរទេសត្រូវបានបន្ធូរបន្ថយ ប្រទេសឡាវ ដែលជាប្រទេសមួយក្នុងចំណោមប្រទេសអភិវឌ្ឍន៍តិចបំផុតនៅអាស៊ីអាគ្នេយ៍ មានសក្តានុពលក្លាយជាទិសដៅសម្រាប់ការវិនិយោគ និងក្លាយជា “ប្រទេសកម្ពុជាថ្មី” ។ នេះបើយោងតាមការចេញផ្សាយរបស់សារព័ត៌មាន SCMP នៅថ្ងៃទី២ ខែមីនា ឆ្នាំ២០២១ ។
រដ្ឋាភិបាលឡាវ កាលពីខែសីហា ឆ្នាំមុន បានដាក់ចេញជាផ្លូវការនូវការកែប្រែច្បាប់ថ្មី ដែលអនុញ្ញាតឱ្យមានកម្មសិទ្ធិលំនៅដ្ឋាន សម្រាប់ជនបរទេសជាលើកដំបូង នៅក្នុងប្រទេស ដែលអនុញ្ញាតឱ្យជនបរទេស មានសិទ្ឋកាន់កាប់កម្មសិទ្ធលំនៅដ្ឋានរហូតដល់៥០ឆ្នាំ។
ច្បាប់នេះក៏បើកលទ្ធភាព សម្រាប់ក្រុមហ៊ុនបរទេស ដើម្បីអភិវឌ្ឍគម្រោងអចលនទ្រព្យផងដែរ ប៉ុន្តែដោយសារច្បាប់នេះ មិនទាន់ត្រូវបានពិនិត្យពេញលេញ ភាពមិនច្បាស់លាស់ និងហានិភ័យនៅតែមានសម្រាប់វិនិយោគិនបរទេស។
ច្បាប់ថ្មីនេះកើតឡើង ចំពេលសេដ្ឋកិច្ចឡាវត្រូវបានគេប៉ាន់ស្មានថា បានធ្លាក់ចុះ៤.៥ភាគរយនៅក្នុងឆ្នាំ២០២០ (យោងតាមធនាគារអភិវឌ្ឍន៍អាស៊ី) ដោយសារការរីករាលដាលនៃជំងឺឆ្លង។ មុនពេលវិបត្តិកូវិដ១៩ ឡាវមានកំណើនប្រចាំឆ្នាំថេរប្រមាណ ៦.៥ ភាគរយ។
ជាមួយគ្នានេះដែរ យោងតាមរបាយការណ៍របស់កាសែត Vientiane Times បានឱ្យដឹងថា ប្រតិបត្តិការទិញលក់អចលនទ្រព្យ ក៏ត្រូវបានប៉ាន់ស្មានថាបានធ្លាក់ចុះ ចន្លោះពី១៥ ទៅ២០ ភាគរយកាលពីឆ្នាំមុន។ រហូតមកដល់ពេលនេះ ឡាវបានរាយការណ៍ថា ការឆ្លងកូវីដ១៩មានចំនួន៤៥ករណី ហើយបានទទួលការផ្គត់ផ្គង់វ៉ាក់សាំង ពីប្រទេសរុស្ស៊ី និងចិន។
លោក Georg Chmiel ប្រធានក្រុមហ៊ុន Juwai IQI Group ដែលជាក្រុមហ៊ុនប ច្ចេកវិទ្យាអចលនទ្រព្យ មានមូលដ្ឋាននៅទីក្រុងគូឡាឡាំពួរ ដែលមានជំនាញក្នុងការបម្រើអតិថិជនអ្នកទិញនៅអាស៊ី បានមានប្រសាសន៍ថា “ការអភិវឌ្ឍថ្មីទាំងនេះនឹងបង្កើតឱ្យតម្រូវការពីចិនដីគោក ហុងកុង ជប៉ុន និងកូរ៉េ” ។
លោកបានថ្លែងថា វិនិយោគិនមួយចំនួនគិតថា ប្រទេសឡាវជាប្រទេសកម្ពុជាថ្មី ដែលមិនអាចខកខានការវិនិយោគ ដែលតម្លៃអចលនទ្រព្យ នឹងកើនឡើងយ៉ាងប្រាកដ ខណៈប្រទេសនេះ នឹងមានកំណើនសេដ្ឋកិច្ច វិនិយោគិនចិនចូលមកកាន់តែច្រើន ហើយហេដ្ឋារចនាសម្ព័ន្ធជាច្រើនកំពុងត្រូវបានសាងសង់ឡើង។
ការលើកឡើងរបស់លោក Georg Chmiel សំដៅថា កម្ពុជាបានទាក់ទាញវិនិយោគក្នុងវិស័យអចលនទ្រព្យយ៉ាងខ្លាំង ក្នុងរយៈពេលប៉ុន្មានឆ្នាំចុងក្រោយនេះ ជាមួយច្បាប់លើកទឹកចិត្តដល់វិនិយោគិនបរទេស ក្នុងការវិនិយោគនៅកម្ពុជា ហើយឡាវបាននិងកំពុងដើរតាមលំនាំរបស់កម្ពុជា ក្នុងការទាក់ទាញវិនិយោគិនបរទេស ក្នុងការដាក់ទុនវិនិយោគនៅក្នុងប្រទេសខ្លួន។
ធនាគារពិភពលោកបានបង្ហាញថា ប្រទេសកម្ពុជា គឺទិសដៅវិនិយោគដ៏ទាក់ទាញសម្រាប់អ្នកវិនិយោគបរទេស នៅក្នុងតំបន់អាស៊ីអាគ្នេយ៍ ដោយការវិនិយោគផ្ទាល់ពីបរទេសមានទំហំទឹកប្រាក់ ប្រមាណ៣,៦៦ពាន់លានដុល្លារអាមេរិក ក្នុងឆ្នាំ២០១៩ កើនឡើងទ្វេដង ធៀបនឹងទំហំទឹកប្រាក់១,៨២ពាន់លានដុល្លារក្នុងឆ្នាំ២០១៥ ។
នៅប្រទេសឡាវ ការកើនឡើងនៃការវិនិយោគបរទេសភាគច្រើន នៅក្នុងតំបន់សេដ្ឋកិច្ចពិសេស ទំនងជានឹងជំរុញការវិនិយោគបន្ថែមទៀត នៅក្នុងវិស័យលំនៅដ្ឋាន ខណៈដែលអ្នកប្រតិបត្តិបរទេស នឹងស្វែងរកកន្លែងស្នាក់នៅសមរម្យ៕
