ដោយ ម៉ាណេត
ភ្នំពេញៈ ការវិនិយោគនៅផ្សារហ៊ុន ជាការវិនិយោគមួយមានហានិភ័យទាប ប៉ុន្តែតើអ្នកវិនិយោគ អាចចូលរួមទិញភាគហ៊ុននៅIPOដោយរបៀបណា ជារឿងត្រូវសិក្សាស្វែងយល់ផងដែរ។
ការទិញហ៊ុននៅ IPO មានពីរដំណាក់កាលសម្រាប់វិនិយោគិន ចូលរួមទិញភាគហ៊ុននៅ IPO (ទីផ្សារដំបូង) ដំណាក់កាលប៊ុកបៀលឌីង (Book-Building) និងបរិវិសកម្ម (Subscription)។ ប៊ុកបៀលឌីង គឺជាដំណើរការស្ទាបស្ទង់ថ្លៃទីផ្សារ ពីវិនិយោគិនសាធារណៈនៅក្នុងទីផ្សារដំបូង។ វិនិយោគិននឹងត្រូវស្នើឱ្យជ្រើសរើស យកថ្លៃមួយនៅចន្លោះថ្លៃ ដែលបានកំណត់ទុកជាមុន រួមជាមួយនឹងបរិមាណនៃភាគហ៊ុន ដែលវិយោគិនចង់ស្នើទិញ។
នៅក្នុងដំណាក់កាលនេះវិនិយោគិន នឹងតម្រូវឱ្យដាក់តម្កល់សាច់ប្រាក់ចំនួន១០% នៃតម្លៃសរុបដែលបានដាក់ស្នើ (ថ្លៃ x បរិមាណ)។ ប៉ុន្មានថ្ងៃក្រោយការធ្វើប៊ុកបៀលឌីង នឹងមានការផ្សព្វផ្សាយពីថ្លៃភាគហ៊ុន ដែលបានកំណត់តាមរូបមន្តមធ្យមទម្ងន់ ដោយផ្អែកលើព័ត៌មានថ្លៃនិងបរិមាណទាំងអស់ដែលប្រមូលបាន។
ក្នុងការទិញភាគហ៊ុននៅ IPO លោក អ្នកអាចរំលងដំណាក់កាលប៊ុកបៀលឌីងបាន ប៉ុន្តែត្រូវចុះឈ្មោះទិញភាគហ៊ុន ក្នុងដំណើរការបរិវិសកម្ម នៅថ្លៃដែលបានកំណត់រួចនៅប៊ុកបៀលឌីង។ ប៉ុន្តែវិនិយោគិន ដែលទទួលជោគជ័យក្នុងប៊ុកបៀលឌីង (ជាអ្នកដែលបានដាក់ស្នើថ្លៃខ្ពស់ជាង ឬស្មើនឹងថ្លៃដែលបានប្រកាស) មានអាទិភាពទទួលបានបរិមា ណភាគហ៊ុនច្រើនជាង។
នៅពេលដែលភាគហ៊ុននៅ IPO ត្រូវបានបែងចែករួចរាល់ជាផ្លូវការ វិនិយោគិនត្រូវបង់ប្រាក់ពេញ ១០០% តាមចំនួនភាគហ៊ុន ដែលបានធ្វើបរិវិសកម្មដោយជោគជ័យ។
ដើម្បីចូលរួមក្នុងដំណាក់កាលណាមួយ វិនិយោគិនត្រូវទៅកាន់ក្រុមហ៊ុនឈ្មួញជើងសាមូលបត្រដែលពាក់ព័ន្ធ ដើម្បីប្រឹក្សាយោបល់ និងបំពេញឯកសាររដ្ឋបាលនានា៕