ដោយៈសុខុម
អាមេរិក: អ្នកជំនាញសេដ្ឋកិច្ចមួយរូបមកពី Bank of America ដែលជាធនាគារវិនិយោគពហុជាតិសាសន៍ និងជាក្រុមហ៊ុនហិរញ្ញវត្ថុដ៏ធំរបស់សហរដ្ឋអាមេរិក បានលើកឡើងថា មហាយក្សចិន មានឱកាសដ៏ល្អក្នុងការបង្កើន ទំហំសេដ្ឋកិច្ចរបស់ខ្លួនទ្វេដង និងវ៉ាឈ្នះសហរដ្ឋអាមេរិក ក្លាយជាសេដ្ឋកិច្ចធំបំផុតក្នុងពិភពលោក។ នេះបើយោងតាមសារព័ត៌មាន CNBC ចុះផ្សាយកាលពីថ្ងៃទី២៦ កុម្ភៈ។
ខណៈប្រទេសចិន កំពុងព្យាយាមធ្វើយ៉ាងណា ឱ្យក្លាយខ្លួនជាប្រទេសជឿនលឿន ប្រធានាធិបតីចិន លោកស៊ី ជីនភីង បានលើកឡើងកាលពីខែវិច្ឆិកា ឆ្នាំ២០២០ ថា វាអាចទៅរួចក្នុងការបង្កើនទ្វេដង នូវផលិតផលក្នុងស្រុកសរុប (GDP) និងចំណូលជាមធ្យមក្នុងមនុស្សម្នាក់ៗរបស់ប្រទេសចិន នៅត្រឹមឆ្នាំ២០៣៥ ។
ការបង្កើនទំហំទ្វេដងនូវ GDP របស់ប្រទេសចិន តម្រូវឱ្យសេដ្ឋកិច្ចទទួលបានកំនើនប្រចាំឆ្នាំជាមធ្យម ៤.៧% សម្រាប់រយៈពេល ១៥ឆ្នាំខាងមុខ ដែលអ្នកសង្កេតការណ៍មួយចំនួនជឿថាពិតជាពិបាកសម្រេចបានណាស់។
ទោះជាយ៉ាងណា លោកស្រី Helen Qiao ប្រធានផ្នែកសិក្សាស្រាវជ្រាវអំពីសេដ្ឋកិច្ចអាស៊ី ប្រចាំស្ថាប័នសិក្សាស្រាវជ្រាវ BofA Global Research ដែលជាផ្នែកមួយរបស់ Bank of America បានលើកឡើងថា វិធានការកែទម្រង់មួយចំនួន នឹងជួយរុញច្រានប្រទេសចិនឱ្យទៅដល់ចំណុចនោះ។
លោកស្រីបានប្រាប់កម្មវិធី Street Signs Asia របស់សារព័ត៌មាន CNBC ថា “យើងគិតថា ប្រទេសចិននឹងអាចសម្រេចវាបាន។ លោកស្រីបន្ថែមថា “បន្ថែមពីលើការបង្កើន GDP របស់ខ្លួនទ្វេដង មហាអំណាចសេដ្ឋកិច្ចនៅអាស៊ី មួយនេះនឹងវ៉ាឈ្នះសហរដ្ឋអាមេរិក ក្លាយជាសេដ្ឋកិច្ចធំបំផុតក្នុងពិភពលោក អំឡុងឆ្នាំ២០២៧ ដល់ឆ្នាំ២០២៨” ។
មហាយក្សចិន ស្ថិតក្នុងចំណោមសេដ្ឋកិច្ចមួយចំនួនតូចណាស់ ទូទាំងពិភពលោកដែលទទួលបានកំណើនក្នុងឆ្នាំ២០២០ បើទោះបីជាប្រឈមឧបសគ្គជាច្រើន ដែលបង្កឡើង ដោយសារការឆ្លងរាតត្បាតវីរុសកូវីដ-១៩ យ៉ាងណាក្ដី។ ទិន្នន័យផ្លូវការបានបង្ហាញថា សេដ្ឋកិច្ចរបស់មហាយក្សចិន នៅតែអាចទទួលបានកំណើន២,៣% កាលពីឆ្នាំមុន ហើយមូលនិធិរូបិយវត្ថុអន្តរជាតិ IMF បានព្យាករថា សេដ្ឋកិច្ចរបស់មហាយក្សចិន នឹងទទួលបានកំណើន ៨,១% នៅឆ្នាំ២០២១នេះ។
ទន្ទឹមនេះ ទិន្នន័យចុងក្រោយបស់រដ្ឋាភិបាលបង្ហាញថា សេដ្ឋកិច្ចរបស់សហរដ្ឋអាមេរិក បានធ្លាក់ចុះ ៣,៥%ក្នុងឆ្នាំ២០២០ ។ មូលនិធិរូបិយវត្ថុអន្តរជាតិ IMF ព្យាករថា សេដ្ឋកិច្ចរបស់សហរដ្ឋអាមេរិក អាចទទួលបានកំណើន ៥,១% នៅឆ្នាំ២០២១នេះ។
ការព្រួយបារម្ភអំពីកំណើនសេដ្ឋកិច្ចរបស់មហាយក្សចិន
នៅក្នុងរបាយការណ៍មួយ ដែលបានចេញផ្សាយកាលពីដើមខែនេះ លោកស្រី Helen Qiao បានលើកឡើងពីក្ដីព្រួយបារម្ភទូទៅ ដែលអាចរារាំងមហាយក្សចិនមិនឱ្យទៅដល់គោលដៅសេដ្ឋកិច្ចឆ្នាំ២០៣៥ របស់ខ្លួន។
លោកស្រីបាននិយាយពីមូលហេតុ៣យ៉ាង ដែលអ្នកមានគំនិតទុទិដ្ឋិនិយមតែងតែលើកឡើងដូចខាងក្រោម ដូចជា ទី១ ចំនួនប្រជាជនដែលមានវ័យចំណាស់ របស់មហាយក្សចិន នឹងធ្វើឱ្យប៉ះពាល់ដល់កំណើនសក្តានុពលរបស់ខ្លួន។ ទី២ អនុបាតបំណុលខ្ពស់ធៀបនឹង GDP (High Debt-to-GDP Ratio) របស់ប្រទេសចិន នឹងគំរាមកំហែងដល់ស្ថិរភាពសេដ្ឋកិច្ច។ ទី៣ គំរូកំណើនសេដ្ឋកិច្ចដែលនាំមុខ ដោយការវិនិយោគរបស់ប្រទេសចិន គ្មាននិរន្តរភាព និងមិនអាចជំរុញកំណើនក្នុងរយៈពេលវែង។
យោងតាមរបាយការណ៍នេះឱ្យដឹងថា ការព្រួយបារម្ភទាំងនោះ នឹងធ្វើឱ្យកំណើនសេដ្ឋកិច្ចរួមរបស់ចិន បង្អង់ល្បឿន។ ជាពិសេសនោះ គឺដោយសារតែរដ្ឋាភិបាលចិន មានគោលនយោបាយមួយចំនួន ដែលត្រូវដោះស្រាយបញ្ហាប្រឈមនានា។
វិធានការទាំងនោះ រួមមាន ការផ្តោតលើការធ្វើឱ្យបំណុល និងគំនិតផ្តួចផ្តើមនានាមានស្ថិរភាពដើម្បីជំរុញនគរូបនីយកម្ម និងការបើកចំហវិស័យសេវាកម្មបន្ថែមទៀតផងដែរ។
លោកស្រី Helen Qiao បានប្រាប់សារព័ត៌មាន CNBC ថា ទោះជាយ៉ាងណា ដំណើររបស់ប្រទេសចិន ឆ្ពោះទៅកាន់គោលដៅ២០៣៥ របស់ខ្លួនគឺមិនមានហានិភ័យឡើយ។ លោកស្រីបានបន្ថែមថា ទោះបីជាប្រទេសចិន ធ្វើកំណែទម្រង់តាមការសន្យាក្ដី ក៏មានកត្តាជាច្រើន ដែលប្រទេសនេះមិនអាចគ្រប់គ្រងបាន។
អ្នកជំនាញសេដ្ឋកិច្ចរូបនេះបានលើកឡើងបន្ថែមទៀត អំពីភាពតានតឹងរវាងរដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងប៉េកាំងថា អាចជាការគំរាមកំហែងដល់កំណើនសេដ្ឋកិច្ចរបស់ចិន។
លោកស្រីថ្លែងថា “តើទំនាក់ទំនងនោះនឹងនៅតែផ្អែមល្ហែម និងមានសន្តិភាពដែរឬទេ? យើងមិនប្រាកដដល់ម្ល៉ឹងទេ” ។
ទំនាក់ទំនងការទូតរវាងសហរដ្ឋអាមេរិក និងមហាយក្សចិន មានភាពតានតឹងកាន់តែខ្លាំងកើនឡើង អំឡុងអាណត្តិកាន់អំណាច របស់អតីតប្រធានាធិបតី ដូណាល់ ត្រាំ ហើយបានក្លាយជាការគំរាមកំហែងធំបំផុតមួយ ដល់សេដ្ឋកិច្ចពិភពលោកទាំងមូល មុនពេលផ្ទុះការឆ្លងរាតត្បាតវីរុសកូវីដ-១៩ ៕
