ដោយៈ សាវុធ
ភ្នំពេញៈ អគ្គនាយកនៃអគ្គនាយកដ្ឋានពន្ធដារបានបង្ហាញនូវការព្រួយបារម្ភពីការផ្ទុះរីករាលដាលជំងឺកូវីដ-១៩ ចូលសហគមន៍ក្នុង “ព្រឹត្តិការណ៍២០កុម្ភៈ” ដែលវាអាចមានផ្ដល់ប៉ះពាល់ទៅដល់ចំណូលពន្ធ (ចំណូលជាតិ)។
រដ្ឋមន្រ្តីប្រតិភូមអមនាយករដ្ឋមន្រ្តី ទទួលបន្ទុកអគ្គនាយកនៃអគ្គនាយកដ្ឋានពន្ឋដាលោកគង់ វិបុលបានថ្លែងកាលពីថ្ងៃម្សិលម៉ិញនេះថា ចំពោះបញ្ហានេះ គឺធម្មតាឱ្យតែមានការរីករាលដាលឆ្លង យើងព្រួយបារម្ភតាំងពីឆ្នាំមុន។ សេដ្ឋកិច្ចមានការប៉ះពាល់ ហើយចំណូលក៏មានការប៉ះពាល់”។លោកឱ្យដឹងទៀតថា “ពន្ធដារមានការព្រួយបារម្ភ ខ្លាចមិនគ្រប់ផែនការ ហើយវានឹងធ្វើឲ្យមានបញ្ហាច្រើន ចំពោះថវិកាជាតិ ព្រោះថាចំណូលពន្ធដារ គឺជាចំណូលទី១ នៅក្នុងចំណោមអង្គភាពដែលប្រមូលចំណូល ជូនរាជរដ្ឋាភិបាល”។
បើទោះជាមាន ការព្រួយបារម្ភ ពីការផ្ទុះរីករាលដាលជំងឺកូវីដ-១៩ ចូលសហគមន៍ ក្នុង “ព្រឹត្តិការណ៍២០កុម្ភៈ” យ៉ាងណាក្ដី ក៏លោកគង់ វិបុលបានបញ្ជាក់ថា អគ្គនាយកដ្ឋានពន្ធដារ មិនប្រងើយកណ្តើយចំពោះវិបត្តិជំងឺកូវីដ-១៩នោះទេ ហើយពន្ធដារនៅតែបន្ដវិធានការដ៏ម៉ឺងម៉ាត់ ក្នុងការប្រមូលពន្ធ។
ជាមួយគ្នានេះដែរ លោក គង់ វិបុល បានគូសបញ្ជាក់ថា ការព្រួយបារម្ភ អំពីការផ្ទុះរីករាលដាលជំងឺកូវីដ១៩ ចូលសហគមន៍ក្នុង “ព្រឹត្តិការណ៍២០កុម្ភៈ” នេះមិនមែនព្រួយបារម្ភ ត្រឹមកម្រិតអគ្គនាយកដ្ឋានពន្ធដារប៉ុណ្ណោះទេ គឺមានការព្រួយបារម្ភរបស់រាជរដ្ឋាភិបាលទាំងមូល។
អគ្គដ្ឋានពន្ធដារ នៅឆ្នាំ២០២០ ប្រមូលបានប្រមាណ២,៨៨៩.០២លានដុល្លារអាមេរិក ស្មើនឹង១០១.៣៦% នៃផែនការប្រចាំឆ្នាំ ធៀបនឹងចំណូល ពន្ធ-អាករ ប្រមូលបាន ក្នុងរយៈពេលដូចគ្នា ឆ្នាំ២០១៩បានរកឃើញថា កើនឡើងចំនួន៤២៣.២០ ប៊ីលានរៀល (ប្រមាណជា១០៤,៤៩លានដុល្លារ) ស្មើនឹង៣.៧៣%៕
