ដោយៈ សាវុធ
ភ្នំពេញៈ មន្ត្រីជាន់ខ្ពស់របស់ក្រសួងពាណិជ្ជកម្មបានលើកឡើងថា ហុងកុងប្រទេសចិននឹងក្លាយជាដៃគូសេដ្ឋកិច្ច ពាណិជ្ជកម្ម និងវិនិយោគដ៏សំខាន់របស់កម្ពុជា បន្ទាប់ពីហុងកុង បង្ហាញចំណាប់អារម្មណ៍ ក្នុងការចូលជាភាគីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)។
លោកសុខ សុភ័ក្ត្ររដ្ឋលេខាធិការក្រសួងពាណិជ្ជកម្មបានថ្លែងដូច្នេះ ក្នុងពិភាក្សាជាមួយគណៈប្រតិភូតំបន់រដ្ឋបាលពិសេសហុងកុងនៃសាធារណរដ្ឋប្រជាមានិតចិន ដែលដឹកនាំដោយលោក Edwad Yau រដ្ឋមន្ត្រីពាណិជ្ជកម្ម និងអភិវឌ្ឍសេដ្ឋកិច្ច តាមប្រព័ន្ធវីដេអូ (Video Conference)។ នេះបើយោងតាមសេចក្តីប្រកាសព័ត៌មានរបស់ក្រសួងពាណិជ្ជកម្ម កាលពីម្សិលមិញ។
លោករដ្ឋលេខាធិការបានថ្លែងថា ហុងកុងប្រទេសចិនមានចំណាប់អារម្មណ៍ ក្នុងការចូលជាភាគីកិច្ចព្រមព្រៀងអាសិប ស្របតាមនីតិវិធី និងលក្ខខណ្ឌតម្រូវនានា ដែលមានចែងនៅក្នុងកិច្ចព្រមព្រៀងនេះ។
លោកថ្លែងបន្តថា “កម្ពុជារំពឹងថា ហុងកុងប្រទេសចិននឹងក្លាយជាដៃគូសេដ្ឋកិច្ច ពាណិជ្ជកម្ម និងវិនិយោគដ៏សំខាន់ ក្នុងការទ្រទ្រង់ការរីកចម្រើនរបស់អាស៊ាន និងតំបន់ RCEP រួមទាំងកម្ពុជាផងដែរ បន្ទាប់ពីក្លាយជាភាគីនៃកិច្ចព្រមព្រៀងនេះ”។
ហុងកុងក៏បានបង្ហាញពីការត្រៀមខ្លួនរួចជាស្រេច ក្នុងការផ្តល់កិច្ចសហប្រតិបត្តិការ និងជំនួយបច្ចេកទេស ព្រមទាំងការពង្រឹងសមត្ថភាពលើវិស័យពាណិជ្ជកម្មអេឡិចត្រូវនិក (E-Commerce) សម្រាប់ជួយកម្ពុជា ក្នុងការចូលរួមចរចាក្រោមក្របខណ្ឌអង្គការពាណិជ្ជកម្មពិភពលោក (WTO) និងកិច្ចសហប្រតិបត្តិការនានាក្នុងការជំរុញពាណិជ្ជកម្មទ្វេភាគីក្នុងកាលៈទេសៈនៃការរាតត្បាតនៃជំងឺកូវីដ-១៩នេះ៕
