នាយកគ្រប់គ្រងមូលនិធិការពារហានិភ័យកំពូលទាំង១០របស់ពិភពលោករកចំណូលបានជាង២០ពាន់លានដុល្លារក្នុងឆ្នាំ២០២០

ដោយៈសុខុម

ញូវយ៉ក:  លោក Israel Englander ដែលជានាយកគ្រប់គ្រងមូលនិធិការពារហានិភ័យ (Hedge Fund) នៅក្រុមហ៊ុនគ្រប់គ្រងការវិនិយោគពិភពលោក Millennium Management រកចំណូលបានរហូតដល់ទៅ៣,៨ ពាន់លានដុល្លារអាមេរិក ដោយធ្វើឱ្យលោករកចំណូលបានខ្ពស់បំផុតក្នុងឆ្នាំ២០២០ ក្នុងចំណោមនាយកគ្រប់គ្រងមូលនិធិការពារហានិភ័យទូទាំងពិភពលោក។ នេះបើយោងតាមទិន្នន័យពីក្រុមហ៊ុន Institutional Investor។

សារព័ត៌មាន CNA បានចុះផ្សាយកាលពីថ្ងៃទី២៣ កុម្ភៈនេះថា លោក Israel Englander រកចំណូលបាន១,៥ពាន់លានដុល្លារ ក្នុងឆ្នាំ២០១៩ និងរកបាន២ពាន់លានដុល្លារ ក្នុងឆ្នាំ២០១៨ ដោយវ៉ាឈ្នះលោក Chris Hohn និងលោក Jim Simons ហើយធ្វើឱ្យក្រុមវិនិយោគិនរបស់លោក ទទួលបានប្រាក់ចំណេញកើនឡើង២៦%។

នាយកគ្រប់គ្រងមូលនិធិការពារហានិភ័យ កំពូលទាំង១០ នៅក្នុងពិភពលោករកចំណូលបានរហូតដល់ទៅ២០,១ ពាន់លានដុល្លារអាមេរិក ក្នុងឆ្នាំ២០២០ ពោលគឺកើនឡើង៥០% បើធៀបនឹង១៣,៤ពាន់លានដុល្លារ ដែលទទួលបានក្នុងឆ្នាំ២០១៩ ស្របពេលវីរុសកូវីដ-១៩ កំពុងឆ្លងរាតត្បាត។

យោងតាមទិន្នន័យពីក្រុមហ៊ុន Hedge Fund Research បានបង្ហាញថា មូលនិធិការពារហានិភ័យ ទទួលបានកំណើនជាមធ្យម១១,៧% ក្នុងឆ្នាំ២០២០ ស្របពេលមានការសម្រុកលក់ចេញខ្លាំងកាលពីខែមីនា និងការបិទសេដ្ឋកិច្ចទ្រង់ទ្រាយធំ ក្រោយផ្ទុះការឆ្លងរាតត្បាតវីរុសកូវីដ-១៩។

ទោះជាយ៉ាងណា ប្រាក់ចំណេញជាមធ្យម របស់នាយកគ្រប់គ្រងមូលនិធិការពារហានិភ័យ កំពូលទាំង១០ក្នុងពិភពលោក ទទួលបានកំណើន៤៣% ក្នុងឆ្នាំ២០២០ ដោ​យ​ក្រុមហ៊ុន Coatue Management ទទួលបានកំណើន ៦៥% ក្រុមហ៊ុន Renaissance Technologies ទទួលបានកំណើន ៧៦% ហើយក្រុមហ៊ុនTiger Global Management ទទួលបានកំណើន៤៨%។ នេះបើយោងតាមទិន្នន័យពីក្រុមហ៊ុន Institutional Investor។

លោក James Simon នាយកគ្រប់គ្រងមូលនិធិការពារហានិភ័យ នៅក្រុមហ៊ុន Renaissance Technologies រកបានចំណូលបាន២,៦ ពាន់លានដុល្លារ កាលពីឆ្នាំមុន ខណៈលោក Chase Coleman  Simon នាយកគ្រប់គ្រងមូលនិធិការពារហានិភ័យនៅក្រុមហ៊ុន Tiger Global Management រកចំណូលបាន២,៥ពាន់លានដុល្លារ ហើយលោក Ken Griffin នាយកគ្រប់គ្រងមូលនិធិការពារហានិភ័យ នៅក្រុមហ៊ុន Citadel រកចំណូលបាន១,៨ ពាន់លានដុល្លារ៕