ដោយៈសុខុម
សហគមន៍អឺរ៉ុបៈ អ្នកនយោបាយមួយចំនួន បានសម្តែងការព្រួយបារម្ភខ្លាចប្រទេសនានាខ្ចីប្រាក់ច្រើនពេក ដើម្បីទ្រទ្រង់សេដ្ឋកិច្ចក្នុងរយៈពេលមួយឆ្នាំខាងមុខនេះ។ ទោះជាយ៉ាងណា លោកស្រី Christine Lagarde ដែលជាប្រធានធនាគារកណ្ដាលរបស់អឺរ៉ុប (European Central Bank) មិនបារម្ភដូចអ្នកទាំងនោះឡើយ។
ប្រធានធនាគារកណ្តាលរបស់អឺរ៉ុប រូបនេះបានប្រាប់សារព័ត៌មាន CNN Business កាលពីថ្ងៃព្រហស្បតិ៍ ទី១៨ កុម្ភៈថា អ្វីដែលលោកស្រីភ័យខ្លាចបំផុតនោះ គឺមិនមែនខ្លាចសហភាពអឺរ៉ុប ជំពាក់បំណុលគរដូចភ្នំឡើយ។ ផ្ទុយទៅវិញ គឺលោកស្រីខ្លាចរដ្ឋាភិបាលនានា ដកកម្មវិធីទ្រទ្រង់សេដ្ឋកិច្ចដូចជាការធានាលើការងារ និងការទ្រទ្រង់ប្រាក់ចំណូលដល់ពលរដ្ឋ មុនវិបត្តិកូវីដ-១៩ កញ្ចប់។
លោកស្រីបានសង្កត់ធ្ងន់ថា “កម្មវិធីទ្រទ្រង់សេដ្ឋកិច្ចបែបនេះ ត្រូវតែកាត់បន្ថយ “បន្តិចម្ដង” និងដោយប្រុងប្រយ័ត្នបំផុត គឺមិនមែនកាត់ចោលភ្លាមៗ ក្នុងពេលនេះឡើយ” ។
រដ្ឋាភិបាលនានាបានទម្លាក់កញ្ចប់ថវិកា សង្គ្រោះរាប់ទ្រីលានដុល្លារ ក្នុងឆ្នាំកន្លងទៅដើម្បីស្ដារសេដ្ឋកិច្ច ដែលបានដាំក្បាលចុះ ដោយសារការឆ្លងរាតត្បាតវីរុសកូវីដ-១៩ ដោយបន្ថែមពីលើការជួយគាំទ្រ មិនធ្លាប់មានពីបណ្ដាធនាគារកណ្តាល ដូចជាធនាគារកណ្ដាលរបស់អឺរ៉ុបជាដើម។
ក្រុមមេដឹកនាំអឺរ៉ុប ក៏បានអនុម័តទម្លាក់កញ្ចប់ថវិកាសង្គ្រោះចំនួន ១,៨ ទ្រីលានអឺរ៉ូ (១,៨ ទ្រីលានដុល្លារ) ផងដែរដើម្បីជួយពង្រឹងសេដ្ឋកិច្ច របស់ប្លុកអឺរ៉ុបឡើងវិញនៅពេលវិបត្តិកូវីដ-១៩ កញ្ចប់។
ប៉ុន្តែលោកស្រី Christine Lagarde បានសង្កត់ធ្ងន់ថា ទោះបីសេដ្ឋកិច្ចចាប់ផ្តើមមានស្ថានភាពល្អប្រសើរសន្សឹមៗ ឆ្ពោះទៅរកការងើបឡើងវិញក៏ដោយ ក៏ក្រុមអ្នកនយោបាយមិនគួរដកកម្មវិធីទ្រទ្រង់សេដ្ឋកិច្ច មុនពេលកំណត់នោះដែរ ព្រោះវាត្រូវការពេលវេលាវែង។
កាលពីខែធ្នូចុងឆ្នាំ២០២០កន្លងមកនេះ ធនាគារកណ្តាលរបស់អឺរ៉ុបបានព្យាករថា សេដ្ឋកិច្ចរបស់អឺរ៉ុប នឹងទទួលបានកំណើន៣,៩% ក្នុងឆ្នាំ២០២១ នេះ ហើយកំណើននឹងឈានដល់កម្រិតមុន ពេលផ្ទុះការឆ្លងរាតត្បាតវីរុសកូវីដ-១៩ នៅត្រឹមពាក់កណ្ដាលឆ្នាំ២០២២ ៕
