ដោយ៖ សាវុធ
ភ្នំពេញ៖ មុននឹងផ្តល់ប្រាក់កម្ចីទៅអតិថិជនណាម្នាក់ធនាគារភាគច្រើនពិចារណាលើ កត្តាសំខាន់ៗបួន។ ក្នុងភាសារអង់គ្លេស គេហៅកត្តាទាំងបួនថា The Four C’s (Capacity លទ្ធភាពសង Capital ទ្រព្យសម្បត្តិ Character ប្រវត្តិសងប្រាក់ Collateral វត្ថុបញ្ចំ)។
លទ្ធភាពសង សំដៅលើសមត្ថភាពនាពេលបច្ចុប្បន្ននិងនាពេលអនាគត ក្នុងការសងប្រាក់ធនាគារវិញ។ និយាយឲ្យចំ គឺតើអ្នកអាចមានប្រាក់សងគ្រប់គ្រាន់ជារៀងរាល់ខែដែរឬទេ? ធនាគារពិចារណាលើកត្តាមួយចំនួនដូចជា៖
– តើអ្នកធ្វើការជាមួយអង្គភាពបច្ចុប្បន្នបានរយៈពេលប៉ុន្មានហើយ តើអ្នកស្ថិតក្នុងមុខដំណែងដដែល ឬដូរមុខដំណែង។ ជាទូទៅធនាគារមើលថា អ្នកបានធ្វើការនៅអង្គភាព ឬតំណែងដដែលយ៉ាង ហោចណាស់រយៈពេលមួយឆ្នាំ។
– តើអ្នករកបានចំណូលប៉ុន្មានក្នុងមួយខែ?
– តើអ្នកចំណាយអស់ប៉ុន្មានក្នុងមួយខែ? រួមនឹងបំណុលផ្សេងទៀតដែលអ្នកជំពាក់?
ទ្រព្យសម្បត្តិ សំដៅលើទ្រព្យទាំងអស់ដែលអ្នកមាន៖
– តើអ្នកមានផ្ទះទេ? មានផ្ទះមានន័យថាអ្នកខិតខំសន្សំទ្រព្យសម្បត្តិ ប្រសិនបើករណីណាមួយអ្នកជួបបញ្ហាសងបំណុលមិនរួច អ្នកអាចនឹងលក់ផ្ទះសងបំណុលបាន។
– តើអ្នករថយន្តឬទ្រព្យអ្វីផ្សេងទៀតទេ?
– តើអ្នកមានសន្សំប្រាក់នៅធនាគារទេ? ប្រសិនបើអ្នកបានសន្សំប្រាក់បម្រុងសម្រាប់គ្រាអាសន្ន នោះប្រាក់នេះអាចយកមកទូទាត់សងក្នុងករណីអ្នកជួបបញ្ហា ហិរញ្ញវត្ថុ។
ប្រវត្តិសងប្រាក់ សំដៅលើការទូទាត់ទាន់ពេលវេលា។ តើប្រវត្តិសងប្រាក់របស់អ្នកកាលពីមុនល្អឬមិនល្អ។ ប្រសិនបើអ្នកមានប្រវត្តិល្អ នោះអ្នកងាយស្រួលខ្ចីប្រាក់ពីធនាគារ។
វត្ថុបញ្ចាំ សំដៅលើទ្រព្យសម្បត្តិដែលអ្នកដាក់ជាគ្រឿងធានាថា អ្នកសងប្រាក់ទៅ ធនាគារវិញគ្រប់ចំនួននិងទាន់ពេលវេលា ប្រសិនបើអ្នកមិនអាចសងបានទេ អ្នកយល់ព្រមលក់ទ្រព្យសម្បត្តិនេះដើម្បីសង។ វត្ថុបញ្ចំ រួមមានផ្ទះជាដើម ជាគ្រឿងបញ្ជាក់ធ្វើឲ្យធនាគារទុកចិត្តមកលើអ្នក៕ ប្រភព៖ Salarean
