ដោយៈ ម៉ាណេត
ភ្នំពេញៈ ទីភ្នាក់ងារសហប្រតិបត្តិការអន្តរជាតិជប៉ុន (JICA) បានសម្រេចអនុម័តនូវជំនួយអភិវឌ្ឍន៍ផ្លូវការ (ODA) សម្រាប់គម្រោងអភិវឌ្ឍន៍ស្ថានីយ៍ វាស់វែងអចិន្ត្រៃយ៍ ដោយផ្កាយរណប សម្រាប់ការរៀបចំដែនដី និងការអភិវឌ្ឍហេដ្ឋារចនាសម្ព័ន្ធនៅកម្ពុជា ខណៈថវិកាសម្រាប់អនុវត្តគម្រោងនេះ មានចំនួនជា ៧.៣លានដុល្លារអាមេរិក។
ជំនួយ ODA នេះត្រូវបានប្រកាស នៅកិច្ចប្រជុំមួយ រវាងលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងលោកស្រី Kamei Haruko ប្រធានតំណាង JICA ប្រចាំនៅកម្ពុជា នៅថ្ងៃទី៥ ខែកុម្ភៈ ឆ្នាំ២០២១នេះ នៅទីស្តីការក្រសួង។
លោកស្រី Kamei Haruko ប្រធានតំណាង JICA ប្រចាំកម្ពុជាបានលើកឡើងថា តាំងពីឆ្នាំ២០១៧ មក JICA បានរៀបចំវគ្គបណ្ដុះបណ្ដាលជាច្រើន ជូនមន្ត្រីក្រសួងរៀបចំដែនដី នគរូបនីយកម្ម និងសំណង់ប្រមាណជាង១៣០០នាក់ គាំទ្រដល់ការចុះបញ្ជីដីធ្លី ការចុះបញ្ជីអគារសហកម្មសិទ្ធិ និងគោលនយោបាយជាតិស្ដីពីលំនៅឋាន។
លោកស្រីបន្តថា JICA បានសម្រេចអនុម័តនូវជំនួយ ODA សម្រាប់គម្រោងអភិវឌ្ឍន៍ស្ថានីយ៍វាស់វែងអចិន្ត្រៃយ៍ ដោយផ្កាយរណប សម្រាប់ការរៀបចំដែន ដីនិងការអភិវឌ្ឍហេដ្ឋារចនាសម្ព័ន្ធនៅព្រះរាជាណាចក្រកម្ពុជា (CORS) ដែលមានរយៈពេលអនុវត្ត ចាប់ពីខែមេសា ឆ្នាំ២០២០ ដល់ខែកញ្ញា ឆ្នាំ២០២២ និងមានថវិកា សម្រាប់អនុវត្តគម្រោងចំនួន៧.៣៥១.៤០០ដុល្លារអាមេរិក ដែលគម្រោងនេះអាចនឹងចាប់ផ្ដើម នៅខែកក្កដា ឆ្នាំ ២០២១ ខាងមុខ។
លោកស្រី Kamei Haruko បានថ្លែងថា JICA បានសម្រេចអនុម័តនូវជំនួយ ODA សម្រាប់គម្រោងអភិវឌ្ឍន៍សមត្ថភាព ក្នុងការអនុវត្តច្បាប់សំណង់ថ្មី និងអភិវឌ្ឍន៍វិធីសាស្ត្ររក្សាគុណភាពអគារ ប្រកបដោយសុវត្ថិភាព នៅក្នុងវិស័យសំណង់ ដែលមានរយៈពេលអនុវត្តចាប់ពីខែមិថុនា ឆ្នាំ២០២០ ដល់ខែមិថុនា ឆ្នាំ២០២៣ និងអាចចាប់ផ្ដើមអនុវត្តគម្រោងនេះបាន នៅដើមឆ្នាំ២០២១ ។
លោកស្រីបានឲ្យដឹងថា ក្រៅពីការផ្ដល់ជំនួយហិរញ្ញវត្ថុ ជូនដល់កម្ពុជា JICA ក៏តែងតែបានផ្ដល់ជំនួយដូចជា ការកសាងធនធានមនុស្ស ការផ្ដល់ជំនួយបច្ចេកទេសនិងការផ្ដល់អាហារូបករណ៍។
ជាការឆ្លើយតប លោកឧបនាយករដ្ឋមន្ត្រីបានកោតសរសើរ ចំពោះឆន្ទៈដ៏មោះមុតរបស់ចែការ ដែលតែងតែផ្ដល់នូវកិច្ចសហប្រតិបត្តិការល្អ ជាមួយក្រសួងរៀបចំដែនដី នគរូបនីយកម្ម និងសំណង់ ពិសេសបានអនុម័តនូវគម្រោងទាំងពីរខាងលើ ដើម្បីចូលរួមសម្រេចនូវគោលដៅរួមរបស់រដ្ឋាភិបាលប្រទេសទាំងពីរកម្ពុជា-ជប៉ុន។
លោកឧបនាយករដ្ឋមន្ត្រី បានបង្ហាញពីការគាំទ្រ ដល់ការផ្ដល់ជំនួយលើការកសាងសមត្ថភាពមន្ត្រី ដែលពិតជាមានសារៈសំខាន់ សម្រាប់ការកសាងធនធានមនុស្សនៅកម្ពុជា” ។
លោកឧបនាយករដ្ឋមន្ត្រីបានបញ្ជាក់ថា ក្រសួងរៀបចំដែនដី នគរូបនីយកម្ម និងសំណង់ នឹងផ្ដល់អាទិភាពទទួលយកក្រុមហ៊ុនសំណង់របស់ជប៉ុន ដើម្បីក្លាយជាក្រុមហ៊ុន ត្រួតពិនិត្យ និងបញ្ជាក់សំណង់នៅកម្ពុជា ស្របតាមច្បាប់ស្ដីពីសំណង់ និងផ្ដល់អាទិភាពសម្រាប់ក្រុមហ៊ុនត្រួតពិនិត្យ និងបញ្ជាក់សំណង់របស់ប្រទេសជប៉ុន ជួលការិយាល័យ នៅទីស្ដីការថ្មីរបស់ក្រសួងរៀបចំដែនដី នគរូបនីយកម្ម និងសំណង់ផងដែរ៕